DILI, 03 Juñu 2025 (TATOLI)—Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa, halo promosaun diviza ba membru polísia na’in-hitu ne’ebé agora daudaun moras permanente.
Membru na’in-hitu ne’e mak Marcos Silva “Yes Timor”, Rosalina, Ananias no na’in -haat seluk. Sira-ne’e hotu balun sofre moras depresaun (strok) no balun moras komplikadu.
Membru na’in-hitu ne’e balun antes ne’e servisu iha Departamentu Tránzitu Seguransa Rodoviária Munisípiu Dili, balun antes ne’e nu’udár membru patrulla iha Komandu Munisípiu Dili no iha membru na’in-rua mak antes ne’e servisu iha departamentu iha Eskuadra PNTL Dom Aleixo inklui Eskuadra Kristu-Rei.
Membru PNTL na’in-hitu ne’ebé promovidu kompostu husi Sarjentu Xefe Paulo da Costa promove ba postu Inspetór, Ajente Xefe Silbino de Jesus promove ba postu Sarjentu Xefe, Ajente Xefe Ananias Pires da Piedade promove ba postu Asistente Inspetór, Primeiru Sarjentu Regina dos Santos promove ba postu Sarjentu Xefe, Ajente Xefe Marcos da Silva “Yes Timor” promove ba postu Primeiru Sarjentu, Ajente Xefe Raul Filipe dos Reis Soares promove ba postu Primeiru Sarjentu no Sarjentu Constâncio Carlos promove ba Postu Sarjentu Xefe.
Objetivu Komandu Jerál PNTL halo promosaun diviza ba membru na’in-hitu ne’e tanba iha serimónia promosaun diviza ne’ebé mak Komadu Jerál PNTL halo iha loron 26 fulan-Maiu foin lalais ba membru Komandu PNTL Munisípiu Dili, sira la partisipa, tanba ne’e mak Komandante Jerál PNTL ba vizita menbru na’in-hitu referidu atu tula direta diviza ba sira iha idak-idak nia rezidénsia.
Notísia relevante: Membru PNTL 2000-resin sei hetan promosaun diviza
Komandante Jerál Henrique da Costa bá halo uluk promosaun diviza ba membru PNTL na’in-ida ne’ebé hela iha Kintál-Boot, Manu-Meta Rai-Hun na’in ida, Aitarak-Laran na’in ida, iha área Komoro na’in-rua, Bidau Akadiru-Hun ida no Bekora na’in-ida.
Iha biban ne’e, Komanadante Jerál PNTL observa direta membru hirak-ne’e nia kondisaun no konsidera katak membru hirak referidu kondisaun la permite atu halo servisu tanba balun enfrenta moras depresaun no balun moras komplikadu.
Henrique informa katak Komandu PNTL koopera ho Hospital Nacional Guido Valadares (HNGV) halo tratamentu ba membru sira-ne’ebé sofre moras permanente.
Komandu sei koloka membru promovidu
Iha biban ne’e, Komandante Jerál PNTL, hateten Komandu PNTL sei halo desizaun ba membru sira-ne’ebé foin daudaun hetan promosaun diviza.
Nia dehan, membru sira-ne’ebé mak nia diviza sa’e ona ba Inspetór Asistente maibé nafatin halo kna’ar iha patrullamentu, Komandu sei muda bá fatin seluk tuir diviza ne’ebé iha atubele halo servisu.
Henrique promete katak sei fornese formasaun bázika lideransa nian ba membru PNTL ne’ebé promovidu.
“Ba sira-ne’ebé promovidu ne’e, seidauk hetan formasaun. Entaun, iha tempu badak, Komandu relaiza uluk kursu lideransa bázika ba ita-nia membru sira-ne’ebé mak promove husi Ajente bá Ajente Xefe, Serjentu bá Inspetór Xefe para maizumenus sira hatene planu operasaun ruma, planu atividade nune’e sira iha koñesimentu atu dirije sira-nia membru sira,” nia informa.
Kona-ba saláriu no remuneratáriu ba membru PNTL, Henrique hateten membru PNTL promovidu balun iha ona mudansa salariál hafoin Komandu halo promosaun diviza.
Jornalista: Natalino Costa
Editór: Xisto Freitas da Piedade
