VIKEKE, 03 Juñu 2025 (TATOLI)—Diretór Servisu Koorporativu husi Ministériu Administrasaun Estatal (MAE), Angelo Urbano Fernandes, husu dirijente diretór sira iha munisípiu Vikeke implementa Igualidade Jeneru, Defisiénsia no Inklusaun Sosiál (IJDIS) iha ida-idak nia servisu fatin.
“Kada tinan ita sempre realiza sensibilizasaun programa Governu nian ne’ebé liga ba igualidade jeneru. Ita hatene programa ida-ne’e liña ministeriál hotu-hotu ko’alia ba igulidade jeneru. Nune’e MAE konsidera programa igulidade jeneru sai pilár importante ne’ebé kualker Governu ne’ebé mak atu ba ukun ita tenke halo sensibilizasaun. Tan ne’e, iha Vikeke bele implementa iha ida-idak ninia servisu fatin ba igualidade jéneru,” Angelo Urbano Fernandes hateten iha ámbitu loke abertura formasaun no sensiblizasaun ba IJDIS, iha salaun administrasaun Vikeke, ohin.
Igualidade jeneru normálmente ema hanoin haree liu ba diretu feto maibé haree mós konvensaun no ratifikasaun sira seluk ne’ebé Timor-Leste adota.
“Ita haree liu ba ema ho defisiénsia, feto no labarik. Aleinde ne’e, ita mós haree ba asuntu asediu seksuál, ida-ne’e ita-nia governu haree importante tebes. Tan ne’e, programa ne’e hamosu iha liña ministériu ida-idak,” nia hateten.
Dala barak, nia dehan, kultura Timor-Leste nian ne’e mane mak espasu barak liu kompara ho inan-feto sira, maibé tempu agora hahú muda ona pensamentu sira-ne’e no signifika feto no mane iha diretu hanesan.
“Maske iha ita-nia kultura balun mane mak direitu liu maibé ita liga fali ba instituisaun estudu feto no mane ne’e hanesan. Tan ne’e, ita presiza reforsa liután ba programa sira-ne’ebé ita-nia Estadu no Governu tau ona sai importante. Oinsá mak ita atu lori ba ita-nia dezenpeñu servisu loro-loron nian iha servisu fatin, iha uma no ita-nia hahalok loro-loron nian. Ha’u sente ida-ne’e mak importante hodi promove igualidade jeneru,” nia dehan.
Iha fatin hanesan, Sekretáriu munisípiu Vikeke Asuntu Sosiál Organizasaun no Komunitária, Acacio de Sousa, haktuir atividade formasaun no sensibilizasaun IJDIS ne’e importante ba dirijente no autoridade lokál sira iha munisípiu Vikeke hodi implementa.
“Ha’u sente programa ne’e sai importante ba ita dirijente sira hotu iha Vikeke. Tanba ne’e, ha’u husu ba diretór, xefe departamentu sira tenke partisipa másimu tanba ita-boot sira mak implementa iha kada diresaun sira inklui ami autoridade sira,” nia hateten.
Formasaun no sensibilisaun IJDIS ne’ebé foka liu ba dirijente sira no pontu fokál sira iha Vikeke, durante loron rua nia laran mak tersa-kuarta (03-04 Juñu). Atividade ne’e organiza husi ajénsia PARTISIPA no servisu hamutuk ho MAE, Funasaun Públiku, Ministériu Interiór (MI) no Sekretáriu Estadu Inkluzaun (SEI).
Formasaun no senibilizasaun ne’e partsipa husi komandante Polísia Nasionál Timor Leste (PNTL) eskuadra Ossú, diretór munisipál, diretór territoriál, xefe departamentu sira iha munisípiu Vikeke.
Jornalista: Vitorino Lopes da Costa
Editór : Cancio Ximenes
