DILI, 02 Juñu 2025 (TATOLI)—Diretór Jerál Servisu Rejistu Notariadu (DGSRN-sigla portugeza), Agostinho Gonçalves Vieira, hateten DGSRN solisita ona pedidu ba Ministériu (MJ) Justisa atu halo tan akizisaun ba kaderneta pasaporte.
“Ministru Justisa aseita ona katak ita sei halo tan akizisaun ba pasaporte. Totál osan ne’ebé prevee atu hola kaderneta pasaporte hamutuk dolar amerikanu millaun ida. Tuir planu, Setembru ka Outubru ita hahú halo akizisaun ho kuantidade 75.000 ne’e,” Agostinho dehan ba Tatoli iha nia kna’ar fatin, Kolmera, segunda ne’e.
Nia informa, pasaporte ho kuantidade 75.000 ne’e sei mai iha Janeiru tinan oin. “Ita kontinua kolabora ho Empreza Thales hodi halo akizisaun ba sasán ne’e,” nia tenik.
Agostinho la lembra estoke kuantidade pasaporte ne’ebé agora daudaun iha hela notariadu, maibé garantidu katak estoke pasaporte ne’ebé mak agora daudaun iha-ne’e sei bele responde ba nesesidade sidadaun to’o dezembru.
MJ koopera ho BNCTL
Iha biban hanesan, Agostinho Gonçalves, tenik Ministériu Justisa liuhusi Diresaun Jerál Servisu Rejistu Notariadu servisu hamutuk ho Banco Nacional de Comércio de Timor-Leste (BNCTL) halo pagamentu ba pasaporte.
“Agora ami servisu hamutuk ho BNCTL hodi fasilita mobile banking nune’e sidadaun sira-ne’ebé mak trata pasaporte, selu de’it iha-ne’ebá,” nia esplika.
Nia dehan, mobile banking ne’e loke husi tuku 8:30 to’o 15:30 Otl.
“Hirak ne’e ita hakarak oferese atendimentu ne’ebé la lalais ba ita-nia sidadaun sira liuliu atendimentu pasaporte, billete identidade, sertidaun moris, rejistu kriminál no atendimentu sira seluk,” nia informa.
Agostinho hateten, Diresaun Jerál Servisu Rejistu Notariadu iha kompromisu hakarak mellora servisu sira ba atendimentu públiku, nune’e labele hamosu preokupasaun no problema iha atendimentu sira.
Jornalista: Natalino Costa
Editór: Xisto Freitas da Piedade
