DILI, 03 Juñu 2025 (TATOLI)–Governu liuhosi Ministériu Asuntu Kombatente Libertasaun Nasionál (MAKLN), tinan ne’e kontinua konstrui jardin eroi iha territóriu, hodi bele haloot restu mortál sira-ne’ebé mak sei iha osuáriu.
Sekretáriu Estadu ba Veteranu, Cesário Silva “Merak”, infroma jardin eroi ne’e mak fatin ikus ne’ebé governu prepara ba ema sira-ne’ebé mak luta ba independénsia Timor-Leste nian.
“Jardin eroi daudaun iha Timor-Leste ne’e estabele kuaze iha munisípiu hotu-hotu, maibé balu ninia konstrusaun hahú hala’o hela, balu atinje ona pursentu boot, balu finaliza no haloot ona restu mortál. Ezemplu iha Kelikai, Laga, Same no Aileu”, dehan Cesar da Silva “Merak ba TATOLI iha nia knaar fatin Kaikoli, tersa ne’e.
Merak hatutan ba munisipiu seluk daudaun ne’e iha hela konstrusaun. “Ezemplu Uatulari projetu ne’e hala’o kedas iha 2021, maibé to’o agora sedauk finaliza, entaun ami haruka kompañia para tanba la kumpre dever bazeia ba kontratu, tinan oin loke fali konkursu foun ba kompañia nune’e bele kontinua fali konstrusaun”, dehan nia.
Nia informa munisípiu Ainaru iha projetu rua mak daudaun ne’e la’o hela mak konstrusaun odamatan boot tama ba jardin (portaun entrada) no bronzon. Portaun entrada seidauk finaliza, falta de’it pursentu rua hanesan ne’e para finaliza no bronzon ne’e finaliza ona.
MAKLN mós sei iha planu 2026 atu estabelese kampa sira iha jardin eroi hotu-hotu, hodi halo serimónia funebre.
Konstrusaun balu sei la’o hela. Projetu foun mak iha Suai, daudaun ne’e halao ona morru iha postu administrativu Maukatar, maibé mudansa klimátika, tanba fatin ne’ebá harii ona portaun entrada, maibé rai halai, tanba ne’e mak sei muda fali ba tetuk, maibé hirak ne’e sei halo karta ba IJE hodi ba halo limpeja, nune’e bele haree posizaun hodi harii fali portaun tama, morru no kampa sira.
Notísia relevante: Konstrusaun muru protesaun iha Jardín Erói iha Manu-Kaitete atinje 61%
Jornalista : Osória Marques
Editora : Rita Almeida
