DILI, 04 Juñu 2025 (TATOLI)—Ministru Agrikultura, Pekuária, Peska no Floresta, Marcos da Cruz, relata katak entre fulan-Janeiru no Juñu 2025, Diresaun Nasionál Veterinária vasina ona asu hamutuk 1.557 ho vasina anti rabies iha munisípiu sira hanesan Bobonaru, Kovalima, Dili, Ermera, Likisá inklui Oekusi.
Ministériu mós rejista ona, hahú hosi tinan 2024 to’o ohin loron, asu sira-ne’ebé infetadu ho vírus rabies iha Munisípiu Bobonaru, Kovalima no Oekusi.
“Ami vasina asu hamutuk 1.575 ho vasina antí rabies. Ministériu Agrikultura, Pekuária, Peska no Floresta (MAPPF) mós deteta kazu asu afetadu iha Munisípiu Bobonaru hamutuk 56, Kovalima 13 no Oekusi 34,” governante ne’e dehan iha Otél Novo Turismo, Lesidere, Dili, kuarta ne’e.
Ministru ne’e haktuir, MAPPF no Ministériu Saúde iha ona laboratóriu hodi halo teste rabies bainhira populasaun hetan tata husi asu.
Notísia relevante: Koñese moras rabies hodi salva ita, animál no Timor-Leste
Nia husu ba populasaun tomak atu koopera ho Governu hodi fó vasinasaun ba asu sira hasoru moras rabies hodi prevene tranzmisaun virus referidu.
Marcos da Cruz hatutan, Governu sei fahe pamfleitu no vídeo sira-ne’ebé prodús husi MAPPF hodi sensibiliza populasaun.
“Populasaun tenke tau-matan ba asu no lori sira bá vasina atu prevene moras ne’e. Sé de’it mak asu tata tenke hato’o ba tékniku veterinária no bá foti doze vasina iha klínika saúde,” nia sujere.
Governante ne’e esplika, vasina kontra rabies tenke administra iha oras 24 nia laran hodi prevene tranzmisaun virus ne’e.
Iha tinan 2024, MAPPF vasina asu, busa no lekirauk hamutuk 52.524. Husi númeru ne’e, asu hamutuk 48.745, busa 3.530 no lekirauk 249.
Jornalista: Felicidade Ximenes
Editór: Xisto Freitas da Piedade
