DILI, 04 Juñu 2025 (TATOLI) – Prezidente Komisaun E Parlamentu Nasionál, ne’ebé trata Asuntu Infraestrutura, Marcos Xavier, husu ba Governu liuhusi entidade kompetente atu implementa ona Lei Medida Tutela Legalidade Urbanístika hodi regula sidadaun sira harii uma iha territóriu.
“Lei ne’e Parlamentu aprova tiha ona, agora Ezekutivu oinsá mak atu implementa no halo sosializasaun iha territóriu ba komunidade”, nia hato’o iha Parlamentu, ohin.
Iha fatin hanesan, membru Komisaun E, Dário Madeira, hateten lei ne’e aprova no entrada vigór ona, maibé to’o agora ninia implementasaun la la’o. “Hanesan membru Komisaun E ezije nafatin ba Governu tenke implementa ona”, nia husu.
Deputadu FRETILIN ne’e preokupa katak iha Dili agora xinés sira halo konstrusaun uma andár barak no konklui lalais no ikus mai la tuir padraun ne’ebé bele hamosu risku ba dezastre, bainhira akontese rai nakdoko.
“Tanba agora kuaze Xina atu domina ona, liuliu iha sidade Dili loke loja boot barak. Lei ne’e tama iha vigór loloos hahú implementa. Ministériu Obra Públika tenke kontrola ona”, hato’o.
Relembra katak iha 25 Fevereiru 2025, Parlamentu liuhusi reuniaun plenária aprova proposta lei númeru 9/VI (1a) Lei Medida Tutela Legalidade Urbanístika iha finál globál ho votu a favór 39, kontra rua no abstensaun 15.
Notísia relevante: PN aprova proposta-lei medida tutela legalidade urbanístika iha finál global
Jornalista: Nelson de Sousa
Editora: Maria Auxiliadora
