BOBONARU, 04 Juñu 2025 (TATOLI)—Ministériu Finsna (MF), kuarta ne’e, halo diseminasaun dekretu-lei númeru 1/2025, 08 Janeiru, kona-ba kodigu aprovizionamentu no Kontrata Públiku ba funsionári sira setór privadu no setór públiku iha munisípiu Bobonaru.
Notísia Relevante: MF disemina kódigu aprovizionamentu ba autoridade no empreza lokál iha Kovalima
Diretór Jerál Sentru Formasaun Jestaun Finansa Públika Ministériu Finansa, Martinho Lopes, hateten diseminasaun ne’e importante tanba bainhira implementa dekretu-lei ne’e bele iha intendementu no interpretasaun hanesan hahú husi nasionál, munisípiu no rejiaun Administrativa Espesiál Oé-Cusse Ambeno (RAEOA).
Diretór ne’e hatutan, atividade hanesan edukasaun sivika ba empreza sira-ne’ebé servisu iha administrasaun públika ba Profisionál Jestaun Finansa Públika liuliu iha área aprovizionamentu.
“Nune’e, dekretu-lei ida-ne’e implementa, ita tuir regras no prosedimentu ne’ebé iha. Tanba, iha anteriormente halo fallansu lubuk ida, entaun dekretu-lei ida-ne’e ita disemina uluk atu hateten ninia espíritu kada artigu ida-ne’e interpreta saida. Nune’e, bainhira implementa, funsionáriu sira bele hatene interpretasaun kada artigu mensiona iha dekretu-lei kodigu aprovizionamentu,” Nia informa ba Jornalista sira iha Salaun Maria-Tapo
Sekretáriu Autoridade Munisípiu Bobonaru ba asuntu Administrasaun no Finansas, Domingos da Costa, hato’o aagradesementu ba Ministériu Finansa no konsidera atividade ne’e nu’udár oportunidade di’ak ida tanba bele hetan informasaun foun.
“Bobonaru durante ne’e prepara hela, maibé prepara ho matenek ne’ebé mak iha ami nia-ulun maibé limitadu oituan. Ida-ne’e mak susar uitoan no halo ami susesu iha ami-nia programa sira,” nia dehan.
Enkuantu atividade diseminasaun ne’e realiza kobre ona Munisípiu 12 no semana oin sei kontinua ba RAEOA. Dekretu-lei númeru 1/2025 ne’e, entrada em vigór iha loron 10 Juñu 2025.
Notísia Relevante: Ekipa MF disemina dekretu-lei aprovizionamentu foun ba entidade Vikeke
Jornalista : Sergio da Cruz
Editór : Cancio Ximenes
