DILI, 04 Juñu 2025 (TATOLI)—Ministru Administrasaun Estatál, Tomas do Rosário Cabral, simu orientasaun husi Primeiru-Ministru, Kay Rala Xanana Gusmão, atu suspensaun serbisu atuál Prezidente Autoridade Munisípiu (PAM) interinu Bobonaru durante fulan-tolu tanba komete irregularidade.
“Ha’u simu despaisu husi Primeiru-Ministru katak suspende provizóriu ba knaar Prezidente Autoridade Munisípiu Bobonaru, entaun ha’u indika fali Diretór ida hodi bele hala’o knaar administrativu interinu hanesan PAM,” Ministru Cabral informa iha salaun enkontru Ministériu Edministrasaun Estatál (MAE), Kaikoli, Kuarta ne’e.
Governante ne’e dehan, bainhira atuál PAM Bobonaru kumpre ona rekezitu maka sei kontinua hala’o knaar hanesan baibain.
“Daudaun ne’e Ministru indika fali Diretór Apoiu Suku mak sai hanesan Koordenadór Autoridade Munisípiu Bobonaru, Celestino Marques mak lidera hela serbisu administrativu autoridade munisipál nian,” nia akresenta.
Notísia relevante : Autoridade Bobonaru lansa primeira pedra konstrusaun irrigasaun Genumatan Ritabou
Ministru dehan, kazu ida-ne’e laiha levantamentu kontinua no labele prosesa tuir lei enkuantu determinasaun tempu liu ona fulan-neen tanba bainhira ema ida atu hato’o keixa tenke molok fulan-neen, nune’e suspeitu ne’e hetan de’it suspensaun provizóriu husi MAE.
Pesoál saúde iha postu Balibo, AP, relata, problema entre nia ho PAM Bobonaru ne’e la’ós foin mak akontese maibé iha fulan-Agostu tinan kotuk, maibé informasaun foin virál iha tinan ida-ne’e.
“Kronolojia ne’e hanesan ne’e, PAM ne’e hala’o nia viajen husi Dili bá Bobonaru maibé to’o iha Balibo nia sei tama iha Sentru Saúde Balibo hodi halo tratamentu no momentu ne’e mós ha’u mak halo atendimentu, maibé durante atendimentu nia hasee ha’u-nia tattoo iha liman hodi goza no kaer fali ha’u-nia liman, sein iha lisensa ne’e asédiu seksuál,” Dotoura ne’e haktuir via telefónika.
Pesoál saúde ne’e dehan, nia sente ofendidu tebes ho asaun ne’e tanba nia mós la koñese di’ak PAM Bobonaru, nune’e nia sente laiha respeita umanidade satán iha fatin públiku tanba pasiente barak mak haree.
“Pasiente barak tan nia halo fali asaun hanesan ne’e ema dehan ita la profisionál, entaun iha momentu ne’e kedas ha’u-nia mentál ne’e down tebes no ha’u konta problema sira-ne’e hotu ba ha’u-nia família no kolega, entaun sira haruka ha’u ba hato’o keixa iha Polísia. Maibé bainhira ha’u hato’o keixa tenke iha saksi, ha’u bolu saksi sira lakohi tanba tauk, entaun ha’u la kontinua hato’o keixa,” AP konta tuir.
Liu tiha fulan-hitu maka informasaun kona-ba kazu ne’e espalla iha edifísiu Ministériu Saúde Maliana, nune’e PAM Bobonaru hato’o karta ida ba Xefe sira iha munisípiu atu haruka AP hasoru diretamente, maibé Doutora rejeita atu hasoru.
“Ha’u hakfodak kazu ne’e espalla no barullu fali iha Marsu nia laran to’o iha nasionál Maliana inklui iha Ministériu Administrasaun Estatál Dili no Sekretaria Estadu Igualdade Jéneru (SEI), entaun prontu husi ne’e kedas ekipa MAE no SEI mai halo identifikasaun dadus iha Balibo no finaliza ona karik mak sira submete relatóriu ba parte kompetente sira,” nia katak.
AP hato’o mós keixa ba Polísia Eskuadra Postu Balibo maibé membru Polísia sira dehan kazu ne’e labele levanta ba oin tanba durasaun tempu liu ona fulan-neen.
“Katak bainhira hakarak hato’o keixa labele liu fulan-neen. Nune’e problema ne’e la rezolve tuir lei. Ha’u mós hetan motivasaun husi SEI ne’ebé trata kona-ba asuntu igualdade jéneru nian, entaun husi ne’e sai hanesan lisaun ida mai ha’u atu forsa nafatin lalika tauk atu espresa buat ruma ne’ebé ita hasoru ho ema seluk ne’ebé ita la konese. Aleinde ne’e, ba feto maluk sira mós lalika tauk tenke brani foti desizaun se ita sente ita-nia an ne’e hetan asédiu ruma,” nia sujere.
Liga ho asuntu ne’e Jornalista seidauk hetan konfirmasaun ruma husi PAM Bobonaru.
Jornalista : Alexandra da Costa
Editora : Julia Chatarina
