DILI, 04 Juñu 2025 (TATOLI) – Reprezentante povu iha uma fukun Parlamentu Nasionál (PN) husu ba Ministériu Asuntu Kombatente Libertasaun Nasionál (MAKLN) atu haloot restu mortál sira iha territóriu iha fatin ne’ebé dignu.
Deputada FRETILIN, Helena Martins, preokupa ho restu mortál matebian Vicente Reis Sahe ne’ebé kle’ur ona tau iha uma no to’o agora sei rai nafatin.
Nia observa katak aleinde ne’e sei iha restu mortál sira seluk iha territóriu ne’ebé seidauk rekolla ho didi’ak hodi haloot iha fatin dignu.
Nune’e mós deputadu FRETILIN, Dário Madeira, haktuir katak iha postu administrativu Uatulari, munisípiu Vikeke, restu mortal barak mak tau hamutuk iha uma komunidade nian iha tinan barak nia laran no to’o agora seidauk haloot.
“Husu ba Ministériu kompetente tenke rezolve hodi haloot lalais iha fatin dignu, tanba sira-nia mate mak ohin ita independénsia”, dehan.
Preokupasaun hanesan mós mai husi deputadu CNRT, Natalino dos Santos, kona-ba monumentu Setembru Negro, iha Kovalima, ne’ebé daudaun kuaze fotografia no naran erói sira-nian komesa lakon, nune’e presiza atu halo reabilitasaun.
“Tanba ne’e bolu MAKLN tau atensaun hodi prezerva hanesan istória ba memória luta libertasaun”, nia hato’o.
Sekretáriu Estadu ba Veteranu, César dos Santos da Silva ‘Merak’, informa restu mortál ne’ebé seidauk haloot iha uma-mahon munisípiu sira hamutuk 10.726.
“Ida ne’ebé haloot ona mak 1.989, barak mak seidauk haloot, nune’e ami sei prepara kondisaun hodi bele haloot”, Merak dehan ba Tatoli, kuarta ne’e.
Notísia relevante: Restu mortál 10.726 mak sei iha uma-mahon munisípiu sira
Jornalista: Nelson de Sousa
Editora: Maria Auxiliadora
