DILI, 04 Juñu 2025 (TATOLI)-Sekretáriu Estadu ba Veteranu, César dos Santos da Silva “Merak”, informa restu mortál ne’ebé seidauk haloot iha uma-mahon munisípiu sira hotu hamutuk 10.726.
“Ida ne’ebé haloot ona mak 1.989, barak mak seidauk haloot, nune’e ami sei prepara kondisaun hodi bele haloot”, Merak dehan ba TATOLI iha nia knaar fatin Kaikoli, kuarta ne’e.
Munisipiu Aileu iha restu mortál hamutuk 72, ne’ebé seidauk haloot ne’e iha rua de’it, tanba 70 haloot ona iha tinan 2022. Munisípiu Ainaru restu mortál iha 2.813 ne’ebé iha hela uma mahon Ainaru hein ninia prosesu funebre.
Munisipiu Baukau iha restu mortais 165 mak iha hela uma mahon ne’ebé seidauk haloot, iha uma mahon jardín eroi Fatumaka no haloot ona ne’e hamutuk 989. Munisípiu Bobonaru, Maliana ne’e iha 774 maka seidauk haloot.
Munisípiu Ermera restu mortál hamutuk 3.185, ne’ebé ekipa jestaun patrimóniu halo identifikasaun ona, ida ne’e mak sei haloot iha jardín eroi Glenu ne’ebé agora daudaun hahú ona halo konstrusaun.
Munisípiu Kovalima iha restu mortál iha 779 ne’ebé mak seidauk haloot. Munisipiu Díli iha restu mortál ne’ebé mak seidauk haloot 20, iha 672 ne’e haloot ona.
Munisípiu Lautein nian iha restu mortál hamutuk 239 ne’ebé seidauk haloot. Munisipiu Likisá restu mortál hela 74 mak seidauk haloot, no 259 mak haloot ona iha 2017 iha jardín eroi Likisá.
Munisípiu Manatutu iha restu mortál hamutuk 1.697 mak seidauk haloot, sei tomak hela, la’os Manatutu de’it, iha mós Natarbora mak maiória, tanba ne’e mak prepara hela jardín eroi iha Manatutu nia leten iha Kribas nian no ba fali iha Munisípiu Manufahi seidauk haloot hela haat, barak halot ona iha 2022.
Munisípiu Manufahi iha 38, haloot ona haat no 34 maka seidauk. Munisípiu Vikeke restu mortál hamutuk 944, ne’ebé maka seidauk haloot.
“Husi ne’e ita haree barak mak seidauk haloot tanbá ne’e ita nafatin esforsu hodi bele haloot hotu, maibé la’ós dala ida. Barak maka seidauk haloot tanba sei hein konstrusaun jardín eroi ne’ebé balun iha faze konstrusaun, no balun hein atu finaliza ona”, nia esplika.
Notísia relevante: SEV prioritiza restu mortál iha munisípiu tolu
Jornalista : Osória Marques
Editora : Rita Almeida
