DILI, 04 Juñu 2025 (TATOLI) – Konsellu Ministru deside atu halo lansamentu ba projetu-pilotu ida, ne’ebé propoin hosi Ministru Obra Públika, Samuel Marçal, kona-ba konstrusaun rede eletrisidade subterránea iha parte entre Ponte Habibie no Bekora.
Ministru Obra Públika, Samuel Marçal, esplika katak inisiativa ida-ne’e hakarak atu moderniza infraestrutura elétrika sira ne’ebé eziste, hadi’a fiabilidade fornesimentu enerjia nian no hamenus risku sira ne’ebé relasiona ho rede elétrika iha leten, liuliu iha situasaun udan, anin no rai-lakan ka asidente.
“Ohin, Konsellu Ministru aprova no fó ona apresiasaun, maibé ha’u labele promete ba implementa nian, tanba sei ba iha prosesu aprovizionamentu mak foin implementa projetu-pillotu ne’e”, Samuel Marçal hateten iha Palásiu Governu.
Governante ne’e dehan tempu ona atu hatu hadi’a fiu sira ne’ebé sabraut iha dalan sira, nune’e sai organizadu no tempu udan ruma fiu kanek labele fó risku ba ema-nia vida.
Kona-ba orsamentu ba implementasaun ne’e nia parte seidauk bele ko’alia sai tanba prosesu hotu sei la’o husi Konsellu Nasionál Aprovizionamentu.
Jornalista: Arminda Fonseca
Editora: Maria Auxiliadora
