BAUKAU, 03 Juñu 2025 (TATOLI)—Sistema eletróniku hanesan server no liña internet iha Balkaun Úniku Munisípiu Baukau la funsiona nune’e prejudika atendimentu ba públiku.
Koordenadór Balkaun Úniku Baukau, Euclides Ornai esplika, prosesu atendimentu dokumentu iha Balkaun Úniku obrigadu tenke paradu tanba selver iha fatin referidu seidauk simu sistema ne’ebé instala nune’e prejudika prosesu atendimentu públiku.
Nia konfesa, liña internet mós sai difikuldade ba atendimentu tanba iha failansu nune’e funsionáriu sira obrigadu tenke utiliza Hotspot hodi hala’o serbisu iha edifísiu referidu.
“Ita iha sever no internet ne’ebé instala iha-ne’e, maibé problema mak sistema la simu server ne’ebé TIC instaladu iha-ne’e,” Koordenadór Balkaun Úniku hateten iha ninia kna’ar fatin, tersa ne’e.
Notísia relevante: Governu lansa Balkaun Únika iha Baucau
Euclides haktuir, situasaun referida presiza iha solusaun liuhosi Ministériu Justisa nu’udár na’in ba sistema hanesan halo ajustamentu ho server ne’ebé iha Balkaun Úniku.
Aleinde ne’e, Ajénsia TIC, I.P presiza hadi’a rede internet hanesan aumenta kuota nune’e fasilita prosesu serbisu hodi hala’o atendimentu públiku.
Entretantu, Balkaun Úniku Munisípiu Baukau hala’o lansamentu iha fulan-Janeiru tinan ne’e baziea ba Dekretu-lei númeru 3/2025, loron 22 Janeiru kona-ba Balkaun Úniku no Portál Munisipál ne’e atu regulariza funsionamentu hodi reforsa desentralizasaun administrativa no moderniza serbisu públiku iha Timor-Leste.
Jornalista: Natalino Belo
Editór: Xisto Freitas da Piedade
