SMAONGOK iha Debos: Presiza fasilita formasaun ba ofisiál suku
KOVALIMA, 04 Juñu 2025 (TATOLI) – Servisu Munisipál Apoiu Organizasaun Naun-Governamentál no Organizasaun Komunitária (SMAONGOK) hala’o monitorizasaun ba servisu ofisiál suku, iha Suku Debos, Postu administrativu Suai, munisípiu Kovalima.
“Ami hahú hala’o monitorizasaun servisu ofisiál na’in-haat iha suku sira. Hahú iha loron Segunda no ohin loron ba datoluk, ami hala’o iha sede suku Debos, Postu Suai, munisípiu Kovalima”, Diretora SMAONGOK, Maria de Jesus Ferreira dehan ba TATOLI, iha sede Suku Debos, ohin.
Atividade hala’o monitorizasaun servisu ofisiál na’in-haat ne’e atu haree sira hanesan, pontu ba dahuluk atu observa servisu iha suku hodi haree pontualidade, profesionál, loialidade no disiplina – iha ka la’e.
Ba daruak, esplikasaun lala’ok prienxe 18 livru. Kria formatu kualker dadus (Maneira kontajen dadus iha programa excel).
Ba datoluk, halo observasaun ba jestaun arkivamentu no maneira kria númeru referénsia manuál hanesan karta tama no karta sai no seluktan.
Pontu ba da-haat, limitasaun data submete kualker dadus mak hanesan dadus monografia, demografia, defisiénsia, vulneravel no dadus bazeia ba idade. Pontu ba dalimak, relata obstakúlu no dezafiu sira ne’ebé mak enfrenta iha suku.
Pontu ba da-neen, Jestaun rekursu atu foti dadus iha aldeia. Ba da-hitu, distribui formatu kualker dadus no seluktan.
Tuir ajenda, SMAONGOK hala’o monitorizasaun servisu ofisiál suku iha suku lima ne’ebé pertense ba postu administrativu Suai mak hanesan Suku Beko, Labarai, Kamnasa, Suai no Suku Debos.
Durante halo monitorizasaun, dirijente ne’e nota katak ofisiál suku sira konfuzaun prienxe formatu nune’e presiza fasilita formasaun nune’e bele presta servisu ho efisiente.
Formasaun ba finansa, administrasaun no Sekretária Administrasaun finaliza ona falta fasilita formasaun ba ofisiál asuntu sosiál.
Notísia relevante:https://tatoli.tl/2025/05/29/smaogok-sei-monitoriza-servisu-ofisial-suku-iha-suai/
Jornalista:Celestina Teles
Editór: Rafael Ximenes de A. Belo
