DILI, 04 Juñu 2025 (TATOLI)–Vise-Ministra Asuntu ASEAN, Milena Rangel, hateten Timor-Leste sei hetan benefisiu lubuk ida liuliu iha área ekónomia bainhira adere ona hanesan membru plenu ba ASEAN iha fulan-Outubru ba oin.
Notísia Relevante: TL presiza halo negósiasaun akordu ekonómika ho nasaun membru ASEAN
“Benefísiu ekonómika lubuk ida tanba haree husi nia abitante no ajenda rejiaun ida-ne’ebé kuaze hotu-hotu ko’alia kona-ba komérsiu ida-ne’ebé mais avansadu, ho buat hotu ne’ebé dijitalizadu ho infrastrutura ne’ebé sustentavél no iha protesaun ba ambiente. Ida-ne’e mak benefísiu sira-ne’ebé ha’u bele partilla, tanba sira-ne’e sai ona ajenda rejiaun nian,” Vise-Ministra Asuntu ASEAN ne’e hateten ba Agência TATOLI liuhusi programa “Entrevista Eskluziva” ho topiku “Preparativu sira hahú Juñu-Outubru ba Timor-leste Nia Adezaun hanesan Membru Plenu” iha estúdiu, Farol, foin lalais ne’e.
Nia dehan, kada nasaun membru ASEAN iha obrigasaun atu kontribui ba ajenda importante sira-ne’ebé fó benefisiu direta ba rejiaun liuhusi ekonómiku.
“Asuntu globál tradús ba kontestu rejionál atu nune’e membru hotu-hotu bele kontribui atu fó benefísiu ba rejiaun tomak, entaun ita hanesan Estadu membru ida tama ikus. Ita mós tenke komunga ajenda hirak ne’ebé sira trasa ona, nune’e mak buat barak ita bele hala’o ho instrumentu legál sira hanesan regulamentu, sistema, ita-nia rekursu umanu sira no seluk tán,” nia dehan.
Antes ne’e, Timor-Leste halo esforsu oioin hahú tinan 2011 ho meta ida atu tama hanesan membru plenu ASEAN.
Tanba ne’e, iha tinan 2025, durante simeira ASEAN ba da-46 ne’e nasaun membru sira deklara ho unaminidade katak simu ona Timor-Leste hanesan membru plenu maibé sei ofisializa iha fulan-Outubru 2025 ne’ebé mai ne’e.
Notísia Relevante: Milena: TL iha ona faze ikus atu sai membru plenu ASEAN
Jornalista : Hortencio Sanchez
Editór : Cancio Ximenes
