Ministériu Defeza estabelese gabinete foun hodi organiza kooperasaun ho parseiru
DILI, 05 Juñu 2025 (TATOLI)—Ministériu Defeza konvoka enkontru ho parseiru internasionál sira hanesan Embaixadór no Adidu Defeza akreditada ih Timor-Leste, atu sensibiliza informasaun kona-ba objetivu estabelese Gabinete Koordenasaun no Kooperasaun Internasionál.
Gabinete ne’e foin estabelese iha semana ida-ne’e ho objetivu atu organiza polítika kooperasaun hotu ne’ebé FALINTIL-Forsa Defeza Timor-Leste (F-FDTL) halo ho parseiru internasionál sira atu nune’e bele iha kooperasaun estruturadu.
“Ita estabelese gabinete hodi planeia oinsá bele organiza no kontrola kualker apoiu ka doasaun husi parseiru sira ba ita-nia Forsa Armada para bele aliña ho ita-nia prioridade nasionál no planu Forsa Armada nian,” Diretór Kooperasaun Internasionál no Domíniu Defeza, Fragata Duarte, informa ba jornalista sira iha Auditóriu Ministériu Defeza, Fatuhada.
Notísia relevante : Aprova ona atribuisaun subsídiu no suplementu remuneratóriu ba F-FDTL
Ekipa husi Ministériu Defeza sosializa informasaun ba parseiru internasionál sira-ne’ebé durante ne’e apoiu hodi kapasita dezenvolvimentu Forsa Armada, nune’e fásil atu haree korelasaun liuhusi esforsu sira hotu atubele korrespondénsia relevante ho situasaun atuál ne’ebé sira presiza.
Nune’e mós, parte Ministériu bele hatene progresu husi kooperasaun sira-ne’ebé hetan hodi bele redús dependénsia ba parseiru sira.
“Ita presiza forsa ne’ebé iha futuru hanesan forsa moderna, autononmia no forsa ida-ne’ebé mak profisionál, maske ki’ik maibé iha kapasidade sustentável,” Diretór akresenta.
Aleinde ne’e, sei iha enkontru bilaterál ho nasaun parseiru sira no halo reuniaun kada tinan hodi bele haree atinjimentu no progresu kooperasaun.
Jornalista : Alexandra da Costa
Editora : Julia Chatarina
