BOBONARU, 05 Juñu 2025 (TATOLI)—Xefe suku Bobonaru villa, Jacinto Godinho Pereirra, hateten povu husi suku sia ne’ebé pertense área kobertura Sentru Saúde Komunitária Postu administrativu Bobonaru, daudaun ne’e la halerik ona ba atendimentu saúde iha tempu kalan tanba autoridade munisípiu Bobonaru prepara ona kondisaun ba pesoál saúde sira atu halo atendimentu iha kualker oras.
Xefe suku Jacinto relata, iha tinan kotuk liuhusi orsamentu Programa Nasionál Dezenvolvimentu Suku (PNDS) konstrui ona rezidénsia pesoál saúde ho totál kuartu rua no tinan ne’e liuhusi projetu Planu Dezenvolvimentu Integradu Munisipál (PDIM) halo tan reablitasaun uma ida atu fasilita profesionál saúde deskansa hodi hein pasiente iha tempu kalan.
Notísia Relevante: Komunidade kontente Autoridade Bobonaru halo reabilitasaun ba rezidénsia pesoál saúde
“Ida halo hodi osan PNDS, inaugura tiha ona no funsiona ho di’ak. Ida fali, agora halo hela reabilitasaun ho orsamentu PDIM nian. Tuir ami-nia hare, hanoin ida-ne’e mak di’ak-liu tanba ita nia komunidade moras kalan boot mak mai mós atende kedas tanba iha fatin ne’ebé seguru. Uluk, dalaruma komunidade mai bá buka fali sira iha sira-nia uma hela fatin, distánsia mós dook uitoan husi sentru saúde ba sira-nia hela fatin,” Nia informa ba Agência Tatoli, foin lalais ne’e
Aleinde ne’e, Xefe sentru Saúde Bobonaru, Cesaltino Maia, afirma daudaun ne’e servisu turnu la’o ho di’ak tanba autoridade munisípiu Bobonaru konstrui ona rezidénsiá ba pesoál saúde sira hofi hela ba.
“Ami agora haka’as-an ona, ami-nia rekursu-umanu mós preparadu tiha ona atu priense iha fatin foun ne’e, tanba durante ne’e barak mak kolega sira pasiente sira ba bolu iha uma de’it mak foin mai. Agora lae ona, tanba ami halo pikete, tama iha tuku 05h00 ba leten ne’e nia tenke Xanana apresia Timor-Leste eleitu nu’udar Vise-Prezidente Asembleia Jerál ONU nia tenke mantein iha rezidénsiá, ne’ebé pasiente mai ne’e ami hein atende de’it,” nia dehan.
Nia hatutan, SSK Bobonaru sei mellora di’ak liután atendementu iha tempu kalan tanba foin lalais ne’e empreza lokál Funan-Buras no Deputada Bobonaru, Carminda Carlota, inklui parseiru balun apoia instala ona Solár Panel iha fasilidade saúde ne’e.
“Ne’ebé, kalan mak ahi mate mós la difikulta ami-nia atendimentu, ami kontinua atende tanba Solár Panel iha ONG internasionál fó ne’e ho kapasidade boot,” nia dehan.
Enkuantu, dadaun ne’e SSK Bobonaru iha parteira na’in-haat (4), enfermeiru na’in-hitu (7) no médiku na’in-rua (2) mak preparadu atu halo atendementu ba pasiente durante oras 24 nia laran.
Jornalista : Sergio da Cruz
Editór : Cancio Ximenes
