BOBONARU, 09 Maiu 2025 (TATOLI)—Komunidade kontente tanba Autoridade Munisípiu Bobonaru implementa projetu reablitasaun rezidénsia pesoál saúde sira iha Sentru Saúde Komunitária (SSK) postu administrativu Bobonaru, munisípiu Bobonaru.
Notísia Relevante: Governu inaugura rezidénsia pesoál saúde iha Bobonaro
Komunidade Bobonaru, Agostinha Maia de Jesus, hato’o agradesimentu ba autoridade munisípiu Bobonaru no konsidera obra ne’e bele responde ona komunidade nia preokupasaun durante ne’e, tanba bainhira obra ne’e finaliza mak família pasiente sira la halerik ona ba atendimentu saúde iha tempu kalan.
“Ami durante ne’e ezije beibeik, ohin loron, ita-nia Governu bele halo ona, ida-ne’e mak ami hakarak. Tanba durante ne’e moras ruma kona ami, kalan ne’e araska la halimar, doutór ho infermeiru sira laiha, ita ba bolu de’it iha uma, sira la toba iha ne’e tanba toba fatin laiha. Agora, se uma ida-ne’e di’ak ona, sira tama Dinas kalan ita moras mós mai sira atende liu ona,” nia informa ba jornalista Tatoli, iha merkadu Bobonaru, sesta ne’e.
Nia argumenta SSK Bobonaru presiza duni iha ne’e, tanba pesoál saúde barak mak iha hela iha kapitál Maliana.
“Sira iha ne’e balun husi Maliana, kada dadeersan mak sa’e mai husi Maliana, servisu hotu tiha ne’e iha lrokraik sira tun fali ba Maliana, tanba uma laiha. Bai-loro ne’e di’ak maibé tempu udan ne’e susar loos ba sira, tanba mai to’o iha ne’e sira bokon ona. Depois dalan sa’e mai ne’e mós la di’ak, pasiensia sira ba-mai de’it, ita hanoin fali sira. Foin lala’is ne’e mak sira balun toba tanba uma ida foin halo hotu maibé kuartu rua de’it,” nia dehan.
Sentimentu kontente mai mós husi Komunidade, Felisiano Loe Talo, tanba iha tinan 2024 no 2025 ne’e Governu bele tau prioridade ba infraestrutura saúde iha SSK Bobonaru, atu kria kondisaun ba pesoál saúde liuliu sira-ne’ebé mai husi postu administrativu seluk.
“Iha tinan kotuk, ho osan Programa Nasionál Dezenvolvimentu Suku (PNDS) nian ne’e halo tiha ona uma ba pesoál saúde maibé kartu rua de’it la to’o ida. Maibé, agora aumenta tan ida (1) ne’e, uma boot luan ne’ebé ita-nia doutor, infermeiru ho parteira sira bele halo atendimentu iha kalan tanba sira hela ona iha um aba pesoál saúde nian,” nia hateten.
Enkuantu obra ne’e implementa liuhusi projetu Planu Dezenvolvimentu Integradu Munisipál (PDIM) 2025 ho valór orsamentu $111,466.50 no projetu ne’e responsabliza husi kompañia lokál Mailulu Unipesoál, Lda, ho durasaun kontratu fulan haat (4).
Notisia Relevante: Governu konstrui rezidénsia pesoál saúde iha SSK Bobonaro
Jornalista : Sergio da Cruz
Editór : Cancio Ximenes
