BOBONARO, 06 fevreiru 2025 (TATOLI)—Governu liuhusi Sekreária Estadu Dezenvolvimentu Lokál, kinta ne’e, inaugura rezidénsia pesoál saúde iha Sentru Saúde Bobonaro, munisípiu Bobonaro ne’ebé konstrui liuhusi projetu Programa Nasionál Dezenbolvimentu Suku (PNDS) ho orsamentu $39,500,00.
Sekretáriu Estádu Dezenbolvimentu Lokál, Meteus dos Santos Tallo, husu ba responsável sentru saúde no pesoál saúde sira atu utiliza ka hela iha uma ne’e ho kuidadu, nune’e bele dura ba tempu naruk.
Notísia Relevante: Governu konstrui rezidénsia pesoál saúde iha SSK Bobonaro
“Ita espera ho rezidénsia foun ne’e bele fasilita pesoál saúde sira-ne’ebé servisu pikete kalan nian hodi halo atendimentu ba ita-nia inan-aman liu-liu inan sira ne’ebé atu partus,” Governante ne’e hateten hafoin halo inaugurasaun
Xefe Sentru Saúde Bobonaro, Cesaltino Maia, hato’o agradesimentu ba Governu Konstitusionál da-sia (IX) tanba bele rezolve ona preokupasaun ne’ebé durante ne’e pesoál saúde sira enfrenta.
“Ami-nia pesoál saúde sira durante ne’e toba ida-idak nia uma, pasiente ruma presiza iha tempu kalan entaun teléfone de’it mak mai. Ida-ne’e mak difikuldade ne’ebé ami hasoru. Agora rezidénsia iha ona, pesoál saúde sira tama kalan ne’e bele toba ona iha ne’e,” bia hateten.
Uma ne’e iha kuartu rúa no sala ida ne’ebé kompleta ho haris-fatin no moru haleu.
Enkuantu, totál Pesoál Saúde iha Sentru Saúde Komunitária Postu Administrativu Bobonaro ne’e hamutuk 26.
Notísia Relevante:Saúde Bobonaro rejista kazu dengue 29 maioria afeta ba labarik
Jornalista : Sérgio da Cruz
Editór : Cancio Ximenes
