BOBONARO, 13 agostu 2024 (TATOLI)-Governu liuhosi Programa Nasionál Dezenvolvimentu Suku (PNDS) hahú implementa projetu konstrusaun rezidénsia foun ba pesoál saúde ne’ebé hala’o servisu iha Sentru Saúde Komunitária (SSK) postu Administrativu Bobonaro, munisípiu Bobonaro ne’ebé lokaliza iha aldeia Laktil, suku Bobonaro Vila.
Xefe suku Bobonaro Vila, Jacinto Godinho Perreira, informa líder komunitária ho komunidade hili prioridade ne’e atu kria kondisaun ba pesoál saúde sira nune’e bele fó atendimentu saúde di’ak liután ba pasiente liuliu inan isin-rua ne’ebé atu partu iha tempu kalan.
Notísia relevante: Xefe SSK Bobonaro husu komunidade abitua uza máskara
“Ami-nia komunidade dalaruma kalan boot lori inan-feton sira atu partu ita sei bá buka pesoál saúde sira iha fatin ne’ebé maka dook, entaun ami hanoin ida-ne’e ladún di’ak, ami tenke buka fatin ida besik atu sira halo atendimentu ne’e di’ak liután,” nia informa ba TATOLI, iha Bobonaro, tersa ne’e.
Komunidade postu Bobonaro, Delfina de Fátima, fiar katak ho rezisténsia foun ne’ebé bele fasilita pesoál saúde halo servisu ho efetivu hodi presta atendimentu ba pasiente sira durante oras 24.
“Bainbain ne’e kuandu ami moras no ami presiza urjente mós asraka liu, ami sei ba bolu doutor-sira iha uma mak foin mai, ne’e mós sira ida hela iha Bobonaro ne’e mak atende, tanba pesoál saúde barak mak hela iha Maliana, uma laiha entaun lokraik sira fila, dadeer mak mai fali, ne’ebé ami senti uma foun hotu ona sira bele hela kalan mós atende pasiente,” nia akresenta.
Uma kuartu rua ne’e konstrui ho orsamentu $39,500.00 ho durasaun kontratu fulan haat.
Tuir observasaun Jornalista TATOLI iha terrenu nota katak obra fíziku ba projetu referida dadaun ne’e foin mak to’o faze hada fundasaun.
Notísia relevante: Ai-moruk atende kazu emerjénsia stoke out iha Bobonaro
Jornalista: Sérgio da Cruz
Editór: Evaristo Soares Martins
