Tribunál konsidera pedidu kontestasaun Juiza Maria Natércia ba nomeasaun Carmona laiha lejitimidade

DILI, 05 Juñu 2025 (TATOLI)–Tribunál Judisiál Primeira Instánsia Dili liuhusi Juíz prosesu, António Carmo, hasai ona desizaun hodi responde ba pedidu kontestasaun Juiza Tribunál Rekursu Maria Natércia ne’ebé kontesta desizaun Prezidente Repúblika, José Ramos Horta, ne’ebé nomea Prezidente Tribunál Rekursu foun, Afonso Carmona, iha 29 fulan-Abríl 2025.
Iha desizaun Juíz António Carmo konsidera katak pedidu kontestasaun ne’ebé Juiza Maria Natércia ne’e laiha fundamentu tanba la prenxe ba prosedimentu legál tanba desizaun Xefe Estadu José Ramos Horta ne’ebé nomea Prezidente Tribunál Rekursu foun ne’e tuir duni regra konstitusionál.
Notísia relevante: Juiza Maria Natércia hatama petisaun bá Tribunál Dili kontesta desizaun PR ba Nomeasaun PTR Afonso Carmona
Juíz António do Carmo hasai desizaun ne’e iha loron 27 Maiu 2025. Hafoin halo tiha desizaun, Juíz Prosesu António Carmo notifika kedas Juiza Maria Natércia iha loron referida nune’e fó prazu loron 30 tuir lei haruka hodi fó biban ba Juiza Maria Natércia karik la simu desizaun Tribunál Judisiál Primeira Instánsia Dili, bele rekore rekrusu ba Trubunál Rekursu hodi kontesta desizaun Tribunal Primeira Instánsia.
Entretantu, Juiza Administradora Tribunál Judisiál Primeira Instánsia Dili, Edite Palmira dos Reis, hateten, hanesan Juiza Administradora, la presiza hatene desizaun referida tanba tuir tramitasaun ne’ebé mak iha Tribunál, liuliu liga ba desizaun ne’e, kabe ba juíz ida-ne’ebé kaer prosesu ne’e nia desizaun, tanba ne’e laiha koñesimentu kona-ba ida-ne’e.
“Laiha tanba juíz ne’e idak-idak ho nia desizaun. Advogadu sira mak tenke simu hodi hatene desizaun Tribunal ne’e tuir lei ka lae. Juiza Administradora la bá to’o iha hatene, ne’e laiha,” Edite hateten ba jornalista sira iha Tribunál Judisiál Primeira Instánsia Dili, Kaikoli, kinta ne’e.
Rekorda fali katak, iha loron 29 fulan- Abríl 2025, Juiza Embargadora Tribunál Rekursu, Maria Natércia hatama providénsia kautelár inominada ba Tribunál Judisiál Primeira Instánsia Dili hodi kontesta Prezidente Repúblika, José Ramos Horta nia desizaun ne’ebé nomea Prezidente Tribunál Rekursu foun, Afonso Carmona, tanba la tuir prosedimentu konstitusionál tanba nomea juiz segunda klase lídera Tribunál Rekursu.
Jornalista: Natalino Costa
Editór: Xisto Freitas da Piedade

