DILI, 05 Juñu 2025 (TATOLI) – Primeiru-Ministru, Xanana Gusmão, hato’o nia apresiasaun ba empreza EVEN2U tanba organiza Festivál TasiFest 2025, ne’ebé konsidera fó ona kontribuisaun boot ba promosaun turizmu Timor-Leste no prezervasaun Tasi Timór.
Apresiasaun ne’e hato’o diretamente husi Xanana iha sorumutu ho EVEN2U no artista internasionál sira ne’ebé hola parte iha festivál ne’e. Sorumutu ne’e hala’o iha kuarta-feira ne’e, iha Palásiu Governu, Dili.
Festivál anuál TasiFest agora ne’e envolve artista internasionál sira mak hanesan Anji Manji no Nadia Vega husi Indonézia no Rui Orlando husi Angola. Sira na’in-tolu sei hala’o atuasaun hodi diverte povu Timor Leste, enkuantu promove rikeza kulturál no beleza naturál rai ida-ne’e nian ba mundu.
Diretór-Ezekutivu EVEN2U, Luís Simões, hateten TasiFest la’ós de’it eventu animasaun de’it, maibé nakonu mós ho mensajen sustentabilidade. TasiFest foku ba sustentabilidade hodi lori artista internasionál ho intensaun atu konsensializa sidadaun sira hamenus lixu, konserva tasi ho rikusoin sira seluk.
“Festivál ne’e hamosu kestaun konservasaun tasi, jestaun lixu, no prezervasaun rekursu naturál. Ami hakarak hasa’e konxiensia públiku kona-ba importánsia proteje ambiente, liuliu tasi Timór”, Luís hateten hafoin hasoru malu ho primeiru-ministru.
Realizasaun festival ida-ne’e, tuir nia, hanesan forma parseria ida entre setór privadu no Governu no TasiFest nu’udár setór privadu ida hakarak ajuda Ezekutivu hodi proteje no promove turizmu Timór bá mundu.
“Ami apresia tebes serbisu maka’as Governu nian, liuliu Gabinete Primeiru-Ministru no Gabinete Fronteira Marítima no Terrestre iha prezervasaun tasi. Liuhusi TasiFest, ami hanesan setór privadu hakarak ajuda misaun ida-ne’e no lori Timor Leste nia turizmu ba palku mundiál”, nia subliña.
Artista sira mós rekoñese katak sira sente onradu tebes hasoru ho primeiru-ministru tanba simu sira ho laran kontente. Kantór Anji Manji hateten Xefe Governu di’ak tebes tanba gosta halimar, halo situasaun sai amigavel liu.
“Ami konsege ko’alia kona-ba buat barak, liuliu kona-ba oinsá atu hato’o Timor-Leste nia furak ba mundu”, dehan.
Iha fatin hanesan, DJ Nadia Vega realsa iha enkontru ho xefe Ezekutivu ne’e sei formál tebes maibé ikusmai ko’alia kona-ba konservasaun tasi nian, biodiversidade, no klaru kona-ba TasiFest.
Artista Rui Orlando husi Angola hato’o agradesimentu ba benvindu ne’ebé boot tebes hasoru sira. “Husi saida maka ha’u haree, fatin ne’e furak tebes. Ha’u sente hanesan ha’u iha uma,” nia hato’o.
TasiFest nu’udar eventu kulturál anuál ida ne’ebé povu Timor-Leste hein hela. Aleinde sai divertimentu, festival ida-ne’e mos hanesan meiu ida ba edukasaun no promosaun turizmu tasi nian, liuliu poténsia Tasi Timór ne’ebe riku ho biodiversidade no beleza naturál.
Ho kolaborasaun entre Governu, setór privadu, no artista internasionál sira, hein katak TasiFest sei kontinua sai símbolu ba espíritu konservasaun no janela ida ba promosaun Timor-Leste ba mundu.
Notísia relevante: Anji sei hananu múzika 10 iha Festivál TasiFest 2025
Jornalista: Arminda Fonseca
Editora: Maria Auxiliadora
