Anji sei hananu múzika 10 iha Festivál TasiFest 2025
DILI, 05 Juñu 2025 (TATOLI) – Kantór Famozu husi Indonézia Anji Manji, prontu ona atu kumprimenta nia adeptu sira iha Timor-Leste liuhusi abertura Festivál TasiFest 2025 ne’ebé sei hala’o iha Tasi Tolu, Dili.
Iha entrevista nia hateten prontu ona atu kanta múzika selesionadu hamutuk 10, inklui obra populár sira ne’ebé nia kria ba kantór sira seluk iha Indonézia.
“Ha’u provavelmente sei lori múzika 10. Aleinde múzika sira ne’ebé ha’u rasik kria, ha’u mós sei hananu múzika sira ne’ebé ha’u kria ba kantór sira seluk hanesan Judika, Rizky Febian, no D’MASIV. Sira ne’e hotu ha’u sei lori ho ha’u-nia arranju rasik”, Anji informa hafoin hala’o enkontru ho Primeiru-Ministru, Xanana Gusmão, iha Palásiu Governu Dili.
Kantór Anji, ne’ebé ho naran kompletu maka Erdian Aji Prihartanto, koñesidu tebes ba nia múzika sira hanesan “Dia”, “Bidadari Tak Bersayap”, no “Menunggu Kamu”.
Ninia kareira hahú hanesan vokalista ba grupu múzika Drive molok susesu hanesan solista no kreatór konteúdu dijitál ho kanál YouTube “Dunia Manji”.
Prezensa Anji sai hanesan destake prinsipál ida iha TasiFest 2025, nu’udar festival boot ida iha Timor-Leste ne’ebé lori tema sira múzika, kultura, sustentabilidade, la hó inovasaun.
Festivál ne’e organiza husi EVEN2U no sei hala’o durante loron tolu, husi 05 to’o 07 Juñu 2025, ho alvu vizitante rihun 20 kada loron.
Aleinde Anji, iha TasiFest 2025 ne’e sei iha mós animasaun husi artista internasionál no lokál lubuk ida hanesan, Rui Orlando (Angola), ne’ebé prontu atu atua ho ritmu típiku kizomba angolanu. Nia sei kanta múzika bele to’o 20, Ricki-Lee no Cyril (Austrália), ne’ebé sei halo toka pop no EDM, Nádia Vega (Indonézia) ne’ebé sei atua hanesan DJ no promove Dili nia fatin turístiku sira.
Nune’e mós line-up husi múziku lokál sira hanesan Klamar, Dália Kiakilir, Marvi, no Quatro Cores.
Diretór-Ezekutivu EVEN2U, Luís Simões, esplika TasiFest nu’udar plataforma kulturál ida ne’ebé la’ós fó de’it divertimentu, maibé hametin mós promosaun turizmu no kultura Timor-Leste nian ba mundu.
“Tasi Fest la’ós de’it festival ida, maibé espasu ida ne’ebé kriativu no interativu ne’ebé halibur arte, edukasaun, sustentabilidade, no interkámbiu kulturál”, nia hatete.
Hodi hatutan, RTTL sei halo tranzmisaun direita ba atividade ne’e, maibé enkoraja telespetadór sira atu asiste rasik hodi goza esperiénsia festivál tomak, tenke sosa billete.
Aleinde aprezentasaun muzikál, vizitante sira bele mós hola parte iha semináriu interativu sira kona-ba sustentabilidade no Ekonomia Azúl, no mós atividade sira resiklajen nian no arte kriativu sira. TasiFest 2025 maka momentu ida atu selebra talentu lokál no hametin kolaborasaun kulturál rejionál.
Billete TasiFest disponivel dezde loron 15 Marsu iha fatin oioin hanesan Timor Plaza, Otél Timor, no vendedór ofisiál sira.
Notísia relevante: Rui Orlando, Anji Manji no Nadia Vega to’o iha TL
Jornalista: Arminda Fonseca
Editora: Maria Auxiliadora
