DILI, 04 Juñu 2025 (TATOLI)—Artista internasionál na’in-tolu hanesan Rui Orlando, Anji Manji no Nadia Vega to’o ona iha Timor-Leste (TL), kuarta ne’e.
“Timor-Leste hanesan onra furak ida. Ida-ne’e dahuluk ha’u mai, maibé ida-ne’e sei la’ós ikus mai ha’u. Ba ha’u, ne’e viajen ne’ebé dook, maibé ha’u hakfodak tebes. Prinsipalmente tanba ha’u hatene katak imi ko’alia portugés, hanesan ho ha’u,” Rui Orlando dehan ba jornalista sira, iha Aeroportu Internasionál Prezidente Nicolau Lobato, Komoro, Dili.
Nia afirma, artista angolanu ne’e kontente tebes ho konvite ne’ebé nia hetan atu mai anima povu Timor-Leste liuhusi eventu TasiFest no sei anima múzika kizomba ne’ebé di’ak.
Iha fatin hanesan, Artista Anji Manji, mós sente kontente bele mai Timor-Leste hodi anima povu Timor-Leste liuhusi eventu TasiFest.
Notísia relevante: Artista Rui Orlando no Anji prontu ona atu harame Festivál TasiFest 2025
“Ha’u sente kontente tebes, tanba kle’ur ona artista Indonézia sira la mai iha-ne’e,” nia haktuir.
Aleinde ne’e, artista Nadia Vega haksolok tebes mai haree Timor-Leste nia furak no atu mai anima povu Timor-Leste liuhusi eventu TasiFest.
“Impresionante tebes. Ha’u hakarak mai fali Timor-Leste. Ida-ne’e ha’u mai ba dala rua ona no ha’u haksolok tebes atu lori ha’u-nia maluk Indonézia sira mai haree Timor-Leste nia furak,” Nadia dehan.
Entretantu, artista estranjeiru na’in-tolu ne’e sei anima iha Festivál TasiFest 2025, ne’ebé sei hala’o entre loron 05 no 7 fulan-Juñu, iha Tasi Tolu, Dili.
Jornalista: Felicidade Ximenes
Editór: Xisto Freitas da Piedade
