Artista Rui Orlando no Anji prontu ona atu harame Festivál TasiFest 2025
DILI, 21 Maiu 2025 (TATOLI)—Iha tempu badak, EVEN2U sei realiza Festivál TasiFest 2025 iha Tasi Tolu, hahú husi 5-7 Juñu 2025. TasiFest hanesan festivál kulturál boot liu iha Timor-Leste, iha-ne’ebé foka ba múzika, kultura, sustentabilidade no inovasaun.
Jestór Festivál TasiFest, Luís Simões, hateten eventu ne’e la’ós de’it festivál ida, maibé mós hanesan plataforma ida atu hatudu Timor-Leste nia turizmu no kultura ba mundu. TasiFest 2025 hein atu atrai vizitante 20.000 loron-loron, hodi hametin liután nia pozisaun hanesan eventu rejionál ne’ebé labele lakon.
“Ita hela de’it semana rua ba eventu kulturál boot liu iha tinan ne’e iha Timor-Leste. Ekipa EVEN2U servisu maka’as ona hodi entrega festivál ida-ne’ebé labele haluha, ho programa internasionál ka nível mundiál no foku maka’as ba promosaun talentu no kultura lokál,” Luís informa liuhusi komunikadu imprensa ne’ebé TATOLI asesu, kuarta ne’e.
Nia hatutan katak festivál tinan ida-ne’e nian sei hatudu artista internasionál lubuk ida no talentu lokál sira ne’ebé prontu atu diverte públiku durante loron enerjétiku tolu. Headliners balun ne’ebé sei marka prezensa inklui Rui Orlando (Angola): Kantór prinsipál no múziku angolanu, koñesidu ho múzika susesu sira hanesan “Peço Perdão” no “Te Amo Tanto”, prontu atu lori kizomba nian ba palku TasiFest.
“Ida ne’e sei sai hanesan ha’u-nia primeiravez iha Timor-Leste, ita nia nasaun maun-alin. Ita sei halo festa boot ida hamutuk, lori batida kizomba Angola nian ba imi,” Rui Orlando dehan ho entusiazmu.
Nia dehan, prezensa mós kantór Anji (Indonézia), kantór ida-ne’ebé koñesidu ho múzika susesu sira hanesan “Dia” no “Menunggu Kamu”. Anji sei diverte públiku ho nia atuasaun emosionál.
Nune’e mós, Ricki-Lee (Austrália), artista pop australianu sei lori nia lian melodiozu no prezensa furak iha palku ba TasiFest 2025.
Cyril (Austrália), DJ no produtór múzika ida-ne’ebé sei halo públiku hakfodak ho ritmu eletróniku inovativu sira.
Nádia Vega (Indonézia), DJ talentu husi Indonézia ne’e sei lori nia múzika eletrónika ne’ebé vibrante hodi anima atmosfera.
Aleinde artista internasionál sira, TasiFest 2025 sei hatudu mós artista lokál lubuk ida-ne’ebé prontu atu lori rikeza múzika Timor-Leste nian ba palku festivál nian. Artista sira hanesan Marvi, Klamar, Dalia Kiakilir, Demetrio, Quatro Cores, Nuno Seixas no Quatro sei kahur múzika tradisionál no modernu iha atuasaun únika sira.
DJ lokál sira hanesan DJ Winston, DJ Enio no DJ Queenzha mós sei anima kalan sira TasiFest nian ho batida eletróniku sira-ne’ebé la para.
TasiFest 2025 la’ós de’it festivál múzika nian. Festivál ne’e sei aprezenta mós esperiénsia multidimensionál oinoin ne’ebé imerzivu, hanesan semináriu edukasionál sira kona-ba sustentabilidade no ekonomia azúl, workshop interativu sira kona-ba konxiénsia ambientál, resiklajen no inovasaun kriativu. Sei iha mós interkámbiu kulturál úniku iha espasu vibrante ida, iha-ne’ebé artista internasionál no lokál sira bele fahe sira-nia koñesimentu no kriatividade.
Billete TasiFest 2025 disponivel hahú iha loron 15 fulan-Marsu tinan 2025 iha fatin oinoin, inklui Timor Plaza, Hotel Timor, no vendedór ofisiál sira. Folin billete nian hahú hosi $6.00
Jornalista: Felicidade Ximenes
Editór: Xisto Freitas da Piedade
