DILI, 06 Juñu 2025 (TATOLI)—Prezidente Komisaun Funsaun Publika (KM), Agostinho Leténcio de Deus, hateten hein Konsellu Ministru (KM) aprova reajustamentu saláriu, depois hahú fila-fali rekrutamentu ba funsionáriu públiku.
“Suspensaun ida-ne’e temporária bainhira ita aprezenta ona ita-nia kareirra foun ajustamentu karreira, ita aprezenta ona forsa traballu. Ita aprezenta ona reajustamentu saláriu ba Konsellu Ministru aprova, depois ida ne’e hahú fila-fali rekrutamentu ba funsionáriu públiku sira. Para nune’e, rekrutamentu baze ia ba karreira ne’ebé mak ita aprezenta ona iha Konsellu Ministru,” Prezidente KFP ne’e hateten ba jornalista sira iha edifísiu KFP Matadoru, ohin.
Nia rekorda, suspensaun ne’e maihusi Komisaun Funsaun Públika nian ne’ebé atu responde rekrutamentu sira-ne’ebé hola parte iha rejime jerál.
“Suspensaun ida-ne’e husi komisaun funsaun públika atu responde ba rekrutamentu sira-ne’ebé mak hola parte iha rejime jerál. Suspensaun ida-ne’e ita fó nafatin oportunidade liuliu ministériu rua Ministériu Edukasaun no Ministériu Saúde tanba Ministériu rua ne’e mak ho rejime espesiál. Nune’e, agora mós ita iha hela prosesu ne’ebé mak bele troka profesór sira-ne’ebé mak idade avansadu atu reforma,” nia dehan.
Nia relata, hanesan iha Ministériu Saúde agora iha funsionáriu 4.000-resin no liuhusi númeru ne’e médiku porvolta 3000-resin, husi ne’e mós balun sei ba reforma tanba ne’e mak KFP prioritiza uluk rekrutamentu sira-ne’ebé mak ho rejime espesiál.
“Idade reforma ne’ebé ho idade 60-resin hamutuk 4.752. Liga idade nian, totál funsionáriu públiku neʼebé ita rejista ne’e funsionáriu neʼebé liu ona idade 60 até 89,” nia hateten.
Situasaun forsa traballu iha kontestu funsaun públika ba tinan-2023 nian, tuir dadus atualizasaun iha baze SIGAP KFP rejista funsionáriu permanente inklui ajente administrasaun públika ativu ho totál 39.380, neʼebé kompostu husi feto 14.115 no mane 25.265.
Husi númeru ne’e funsionáriu permanente hamutuk 33.004 no ajente administrasaun públika hamutuk ema na’in-6376.
Jornalista : Osória Marques
Editór : Cancio Ximenes
