DILI, 09 Juñu 2025 (TATOLI)–Dirasaun Nasionál Patrimóniu, Lojístika no Teknolojia iha Ministériu Edukasaun (ME), atribui ona karteira eskolár ba eskola hamutuk 78.
“Entre Janeiru to’o Maiu ita fahe ona karteira eskolár hamutuk 8.874 (meza 4.279, kadeira 4.595) ba eskola hamutuk 78”, dehan Diretór Interinu, Policarpo Mendes, ba TATOLI iha nia knaar fatin Vila Verde, segunda ne’e.
Nia dehan dirasaun ida-ne’e rejista eskola hamutuk 78, husi eskola ne’e pre-eskolár hamutuk 20, Ensinu Báziku Sentrál no Eskola Bázika Filiál hamutuk 34, no Ensinu Sekundáriu Jerál Públiku no Ensinu Sekundáriu Tékniku-Vokasionál hamutuk 24.
Policarpo Mendes relata eskola 14 iha Dili hetan meza 736 no kadeira 850, eskola tolu iha Ataúro hetan meza 332 no kadeira 380. Eskola neen iha Ermera hetan meza 682 no kadeira 760.
“Ita mós fahe meza hamutuk 770 no kadeira 770 ba munisípiu Lautein, Bobonaru hamutuk meza 442 no kadeira 470, ba Likisá meza 600 no kadeira 600, Manatutu meza 100 no kadeira iha 100, ba Manufahi meza iha 270 no kadeira 270. Baukau meza 315 no kadeira 315, Aileu meza 32 no kadeira 80″, nia dehan.
Notísia relevante: EBC 30 Agostu husu ME fasilita karteira eskolár
Jornalista : Osória Marques
Editora : Rita Almeida
