DILI, 05 fevereiru 2025 (TATOLI)-Diretór Ensinu Báziku Sentrál (EBC, sigla portugés) 30 Agostu, Baltazar Barromeu, husu ba Ministériu Edukasaun fasilita karteira eskolár ba eskola referida, nune’e mos pedidu hanesan hato’o husi Diretór Servisu Edukasaun Munisípiu, atu oinsá ME prosesa ona solisitasaun husi eskola sira.
“Ami presiza tan kadeira-meza, tanba kadeira no meza barak mak aat ona, karik bele Ministériu Edukasaun ajuda tan ami para troka ne’ebé aat ona, ami presiza atus rua hanesan ne’e”, Diretór hatete iha knaar fatin-Komoro, kuarta ne’e.
Mesmu nune’e, sira kontinua utiliza no estudante sira seidauk tuur iha rai. “Ami nafatin aguenta buat ne’ebé sei iha hodi hein foun husi Ministériu Edukasaun”, nia informa.
Totál estudante ativu 1845, feto 909 no mane 936. Totál profesór 60, profesór nain-3 mak atinje ona idade reforma. Eskola ne’e iha turma 36 fahe turnu rua, dadeer no lorokraik, ho sala-aula 24.
Diretór Servisu Edukasaun Munisípiu (SEM) Dili, Sabino da Costa Pereira, mos husu ba ME atu prosesa pedidu apoiu karteira eskolár ba eskola sira iha Dili.
Notísia relevante: SEM Dili husu ME halais pedidu apoiu karteira eskolár ba eskola
“Servisu Edukasaun Munisípiu nia pedidu hanesan apoiu meza no kadeira ba eskola sira ne’ebé hetan projetu komunitáriu kompañia entrega ona save ka inaugura ona fulan tolu, maibé kadeira meza seidauk iha inklui mós eskola sira ne’ebé mak kadeira meza aat ona ne’e”, SEM Dili dehan.
Diretór Jerál Edukasaun Pre-Eskolár, Ensinu Báziku no Ensinu Rekorrente, Apolinário Serpa Rosa, hatete dadaun ne’e Ministériu Edukasaun prepara hela kadeira meza husi nasaun Xina mai Timor-Leste. Bainhira kadeira no meza ne’ebé sosa husi Xina ne’e to’o mai iha Timor-Leste, sei distribui kedas ba eskola sira ne’ebé presiza.
“Ita-nia kadeira meza sira sei iha dalan, husi Xina, kuandu to’o ona mai sei distribui ba eskola sira-ne’ebé presiza no bele utiliza”, nia dehan.
Nia dehan, maibé presiza iha pedidu, ME distribui bazeia mós ba pedidu husi servisu edukasaun munisípiu sira.
“Sasán sira-ne’e sei to’o mai iha Ministériu Edukasaun depois mak distribui, maibé servisu edukasaun munisípiu sira mak hato’o pedidu mai, presiza hira depois ita distribui ba sira atu bele fahe bá eskola sira utiliza”, nia dehan.
Notísia relevante: ME la aloka orsamentu ba akizisaun karteira eskolár iha tinan oin
Jornalista : Osória Marques
Editora : Rita Almeida
