DILI, 09 Juñu 2025 (TATOLI)—Ministru Justisa, Sergio Hornai, hateten Ministériu Justisa (MJ) sei submete hikas Estatutu Guarda Prizionál ba Konsellu Ministru (KM) atu halo diskusaun.
“Kona-ba Estatutu Guarda Prizionál nian buat hotu ita halo ona revizaun finál. Fulan ida-ne’e, ita sei submete hikas ba Konsellu Ministru atu diskute,” Sergio hateten ba jornalista sira iha edifísiu MJ, Kolmera, segunda ne’e.
Nia dehan, Governu halo ona aprovasaun ba Estatutu Guarda Prizionál maibé iha buat balun mak seidauk kompletu, tanba ne’e mak Ministériu Justisa deside seidauk implemnta estatutu ne’e no deside halo fali ajustamentu ba buat balun molok lori fali bá Konsellu Ministru hodi halo aprovasaun.
Notísia relevante: Seidauk bele implementa estatutu guarda prizionál
Governante ne’e esplika katak iha estatutu antes ne’e dehan guarda prizioneiru ne’e ninia saláriu prevee tuir rezime espesiál, maibé realidade saláriu la prevee tuir saida mak estatutu ne’e hateten.
Nia dehan, promosaun kareira ba guarda prizioneiru sira-ne’e tuir rejime espesiál, maibé kuandu sira promove entaun saláriu ba sira mós tuir sira-nia promosaun, maski nune’e, estatutu la fundamenta klaru iha-ne’ebá.
Tanba ne’e, Sergio tenik, presiza hadi’a nune’e bele trata guarda prizionál ho dignu tanba sira tinan barak ona dedika sira-nia aan ba instituisaun referida.
Jornalista: Natalino Costa
Editór: Xisto Freitas da Piedade
