DILI, 06 Marsu 2025 (TATOLI)—Ministru Justisa, Sergio Hornai, rekoñese to’o agora seidauk bele implementa estatutu guarda prizionál tanba presiza kompleta tan ho lejizlasaun balun liuliu oinsá mak prevee orsamentu iha estatutu ne’e molok bá iha nia implementasaun.
Governante ne’e esplika labele inisia de’it dekretu-lei ida sein kria kondisaun hodi define loloos lejizlasaun ne’e rasik, tanba ne’e Ministériu Justisa sei haree bá-oin kompleta tan buat balun hanesan estatutu ne’e mak foin implementa.
“Primeiru, ita hakarak hamosu dekretu-lei ida ita tenke haree dehan ita espande tan buat balun, entaun prevee orsamentu. Labele halo tiha lejizlasaun más orsamentu laiha. Buat sira-ne’e tenke iha konetividade. Se ita hamosu lei ida tenke iha kedas orsamentu para ita bele halo ezekusaun,” Sergio Hornai hateten ba TATOLI iha nia knaar fatin, Kolmera, kinta ne’e.
Estatutu ida-ne’e atu regula promosaun kareira ba guarda estabelesimentu prizionál no define mós direitu regalia ho sira seluk tan.
Iha 13 Marsu 2024, Governu liuhosi reuniaun Konsellu Ministru (KM) ordinária, aprova ona projetu dekretu-lei, ne’ebé aprezenta hosi Ministru Justisa, Sergio de Jesus Fernandes da Costa Hornai, kona-ba Karreira Espesiál no Estatutu Guarda Prizionál.
Jornalista: Natalino Costa
Editór: Xisto Freitas da Piedade
