KOVALIMA,10 Juñu 2025 (TATOLI) – Institutu Nasionál Administrasaun Públika (INAP), partilla esperiénsia kona-ba baze dadus ba dirijente ho nia funsionáriu sira husi Servisu munisipál 19 no husi postu administrativu hitu ne’ebé pertense ba munisípiu Kovalima.
Xefe Departamentu Formasaun Tékniku husi INAP, José da Costa Graciano informa katak INAP partilla esperiénsia bazeia ba baze legál dekretu-lei númeru 38/2012 hodi fó kompeténsia ba INAP atu disponibiliza formasaun ba funsionáriu sira.
“Ami mai iha munisípiu Kovalima atu fasilita formasaun IT ba diretór, xefe departamentu no funsionáriu sira , maibé ami foku ba formasaun baze dadus nian”, José da Costa Graciano dehan ba jornalista iha Salaun AMC, ohin.
INAP fasilita formasaun ba funsionáriu públiku iha nasionál no iha munisípiu sira ho tipu formasaun sira hanesan formasaun jestaun eskritóriu, lideransa téknika, lideransa obrigatóriu, formasaun lian no Teknolojia Informasaun (IT).
Atividade formasaun ne’e realizada tanba pedidu husi munisípiu Kovalima kona-ba baze dadus ba dirijente, xefe departamentu ho funsionáriu sira, ho dura
Formasaun ne’e hala’o durante loron lima, hahú iha loron 09 to’o 13 Juñu ne’e, ne’ebé INAP rasik mai la’ós atu hanorin maibé fó orientasaun de’it hodi relembra hikas ba kargu xefia sira atu haree oinsá presta servisu iha parte eskritóriu nian ho tópiku baze dadus.
Formasaun baze dadus ba funsionáriu públiku nune’e loloron uza hodi presta sira-nia servisu uza komputadór nune’e minimiza fallansu.
Razaun fasilita formasaun atu responde nesesidade no hanesan responsabilidade husi INAP hanesan sentru formasaun no nafatin atu eleva koñesementu funsionáriu liuhusi formasaun sira nune’e bele presta sira-nia servisu ho efisiente liu.
Iha sorin seluk, Diretór Servisu Munisipál Administrasaun Rekursu Umanu, José Manuel Gonçalves reforsa katak INAP fasilita formasaun bazeia ba pedidu ne’ebé Servisu munisipál administrasaun Rekursu Umanu submete iha Janeiru 2025 ne’e.
“Ami mak submete pedidu ba INAP no horseik hahú fasilita ona formasaun foku ba baze dadus ba kargu xefia sira no xefe seksaun sira iha postu administrativu hitu no funsionáriu sira ne’ebé presta sira nia servisu iha administrasaun”, nia relata.
Formandu ne’ebé tuir formasaun baze dadus ne’e mai husi funsionáriu sira ne’e asumi kargu diretór servisu munisipál 19 ho xefe departamentu iha munisípiu no husi postu administrativu hitu hamutuk ema na’in-25.
Formasaun hanesan parte ida atu hasa’e sira-nia koñesementu hodi hadi’a diak liu servisu administrasaun nian.
Jornalista:Celestina Teles
Editór: Rafael Ximenes de A. Belo
