DILI, 07 Abríl 2026 (TATOLI)—Governu Timor-Leste liuhusi Ministériu Koordenadór Asuntu Ekonómiku hamutuk ho Emprezáriu Kapitalista Venture, Hendrik Halbe, planeia halo rektutamentu ba timoroan na’in-30 hodi kontinua eskola kona-ba negósiu no empreendedorizmu iha Olanda.
Emprezáriu Kapitalista Venture, Fundadór eskola negósiu no empreendedorismu iha Olanda, Hendrik Halbe, hateten nia hetan akizasaun di’ak liuhusi Timor-Leste, ne’ebé konsidera hanesan nasaun di’ak-liu ho ema sira mak halo nia sente seguru iha Timor.
“Tanba ne’e, ha’u iha intensaun ida atu hari’i universidade privadu iha Timor-Leste, se lae fó bola ba timoroan na’in-30 kontinua eskola iha ha’u-nia universidade iha Olanda. Tanba ne’e, ami sei fó bolsa estudu iha tinan oin ba Timor-Leste atu estudu iha Europa, no aprende kona-ba negósiu manajementu, hodi lori koñesimentu ne’e fali mai Timor,” nia dehan ba jornalista sira hafoin hafoin hala’o enkontru ho Vise-Primeiru-Ministru, Francisco Kalbaudy Lay, iha Faról, ohin.
Nia hatutan, sira mós iha prosesu atu esplora ka harii universidade ida iha ne’e atu hanorin foinsa’e Timor-Leste sira, tanba sira iha poténsia boot ba dezenvolvimentu nasaun.
“Ha’u kontente tanba iha onra atu sai parte ida husi investimentu ne’e ba futuru, no atu tulun iha edukasaun, iha inovasaun no iha empreendedorismu ba future. Tanba ne’e, ha’u sei iha ne’e durante loron balun tan atu esplora no haree oinsá ami bele servisu hamutuk ho instituisaun relevante sira hanesan mós setór produtivu agrikultura,” nia dehan.
Vise Primeiru-Ministru no Ministru Koordenadór Asuntu Ekonómiku, Ministru Turizmu no Ambiente, Francisco Kalbuadi Lay, hateten ohin sira mós diskute investimentu iha área edukasaun nian makaatu hari’i universidade privadu iha Timor.
“Maibé antes ne’e ami sei diskute hela katak atu haruka joven lubuk ida ba tuir treinamentu iha kursu oioin hanesan ospitalidade, otelária no seluk tan iha Olanda. Bele mós sira-nia péritu sira mak mai hanorin iha ne’e,”, Vise Primeiru-Ministru, informa ba jornalista sira iha nia kna’ar fatin Faról, ohin.
Tanba ne’e, nia dehan, durante semana ida iha ne’e empregadór na’in-rua ne’e sei halo mós liña koordenasaun ho ministériu relevante sira-ne’ebé iha ligasaun ba sira-nia investimentu iha Timor-Leste.
Jornalista : Alexandra da Costa
Editór : Cancio Ximenes
