Autoridade garante implementasaun projetu irrigasaun Logo Bere
VIKEKE, 11 Juñu 2025 (TATOLI)-Preokupasaun natar-na’in sira iha suku Osuu de Cima, postu administrative Osuu, munisípiu Vikeke, Jorge Boavida Hornai, konaba implementasaun irrigasaun Logo Bere hetan ona resposta pozitiva husi autoridade ba implementasaun.
Xefe Osso de Cima, Celestino M de Carvalho, klarifika ninia parte la halo impedimentu ba projetu ne’e, maibé prosesu koordenasaun entre empreza ho komunidade.
Nia dehan hanesan autoridade garante ba implementasaun obra irrigasaun Logo Bere. “Ha’u mós koordena ona ho empreza, ne’ebé iha fulan ida-ne’e hahú ona implementa obra. Tanba komunidade no empreza iha ona konsiénsia ba implementasaun obra, nune’e nu’udar autoridade hein prosesu implementasaun”.
Enkuantu natar-na’in, Jorge Boavida, husu atu aselera projetu irrigasaun ne’e, nune’e agrikultór sira bele halai ona natar.
“Irrigasaun Logo Bere ne’e loloos implementa iha fulan-Dezembru 2024, maibé mosu dezentendimentu entre autoridade no empreza implementadór sira, entaun obra ne’e la-la’o”, katak nia ba TATOLI iha postu Osuu, ohin.
Ho situasaun ne’e, nia dehan hasoru ona PAM atu solusiona. Esforsu seluk mak Xefe Suku kompromete ba natar na’in sira atu kontinua projetu irrigasaun.
“Komunidade maioria mak hakarak implementa tanba irrigasaun Logo Berea hetan estragu husi erosaun iha 1998 ne’ebé sai grave. Tan ne’e, durante tinan naruk labele fornese bee ba natar, komunidade barak mak hakarak halo natar, maibé impaktu irrigasaun la di’ak”, nia dehan.
Husi konstrusaun ne’e, uma-kain 20 mak halo ona konkordansia ho parte empreza sobre indemnizasaun bainhira hamosu efeitu ruma.
Konstrusaun irrigasaun ne’e, IX governu konstituisionál liuhusi Ministériu Agrikultura Pekuária Peskas no Florestas (MAPPF) prevee orsamentu ho totál hamutuk $.300.000 husi Orsamentu Jerál Estadu (OJE) tinan fiskál 2025 ba kompañia Haberan Unipessoal.Lda nu’udar manán na’in ba irrigasaun Logo Bere.
Natar ba área irrigasaun Logo Bere purvolta ektare 500-resin ne’ebé abandona no natar ne’e sei benefisia ba abitante suku Osuu de Cima ho totál populasaun 4.263 kompostu husi aldeia Baca-Isi, Belas, Borala, Cai Uai Ho, Liamida, Lugabuti, Uairiu, Uma Ana Ico nomós suku viziñu sira.
Notísia relevante: Empreza responsável hahú konstrusaun eskema irrigasaun Logobere iha Ossu
Jornalista : Vitorino Lopes da Costa
Editora : Rita Almeida
