DILI, 10 Juñu 2025 (TATOLI)-Ensinu Báziku Filiál (EBF) 1 no 2 Kamea Rai-hun liuhusi Koordenadora eskola husu ba Ministériu Edukasaun atu halo morru protesaun ba eskola no mós sirkulár konaba implementasaun uniforme eskolár ba estudante sira.
Madalena de Fátima da Silva hanesan koordenadora hatete morru protesaun importante hodi proteje estudante sira iha tempu udan no mos konflitu kiik entre estudante sira ne’ebé provavelmente konvida inan-aman atu hamosu problema foun iha eskola.
“Ami nia eskola ne’e halo iha 1984, tanba eskola ne’e ami pinta fila fali ne’e mak ema dehan foun, maibé edifísiu ita haree kondisaun la di’ak ida, ne’e ameasa tebes ba estudante sira iha tempu udan no rai nakdoko”, nia dehan ba TATOLI iha Kamea, tersa-ne’e.
Nia haktuir eskola ne’e tama prioridade atu reabilita, maibé to’o agora laiha informasaun.
Enkuantu uniforme eskolár, dirijente eskola referida presiza tebes sirkulár husi ME atu prova ba estudante sira-nia inan-aman.
“Ita presiza sirkulár husi Ministériu Edukasaun atu bele sai hanesan baze legál ida atu ita kria enkontru ho inan-aman husi estudante sira nia, tanba buat hotu ita la’o tuir orden”, akresenta Madalena.
Ho situasaun ne’e, nia dehan estudante sira sei utiliza uniforme mutin ho kór kafé.
Hatán ba preokupasaun ne’e, Diretór Edukasaun Munisípiu Dili, Sabino da Costa Pereira, afirma laiha tán despasu. “Orientasaun klaru ona, koordena ho inan-aman sira hodi deside”.
Nia dehan ba kestaun uniforme iha alternativu rua, ida liuhusi eskola, ida inan-aman sira sosa diretamente iha fatin produsaun sira.
“To’o ohin loron nia simu informasaun husi diretor sentru sira katak inan aman sira hotu-hotu konkorda hatama osan liuhusi eskola mak halo produsaun”, katak Sabino.
Dirijente Edukasaun Munisipál ne’e mos klarifika ba kondisaun eskola sira.
“Planu sira ne’e la’ós ohin ita ko’alia, aban implementa, maibé tékniku sira sei ba haree no halo estudu ba kondisaun rai no tau orsamentu sira, nune’e ita sei tau iha planu”, nia hatán.
Eskola ne’e ho totál estudante ativu hamutuk 514 ho profesór nain 10 kompostu husi feto hitu, mane tolu, ho saladeaula hamutuk neen, fahe ba turnu dadeer no lorokraik.
“Manorin na’in-10 ne’e nain rua mak tama ona idade reforma, ida ho idade 67 no seluk fali 62 no iha profesór ida mak moras, nune’e ami hatama ona proposta dalarua ba ministériu atu koloka profesór mai ami-nia eskola, maibé to’o agora laiha profesór ida mak mai”, tenik nia.
Ho kestaun ne’e, Ministra Edukasaun, Dulce de Jesus, mós hatete presiza klarifika dadus depois mak responde ba públiku.
“Tanba foin daudaun Ministériu Edukasaun halo ingresu espesiál, signifika ema hotu ne’ebé mak tuir ona formasaun atu halo kolokasaun”, katak ministra.
Ministra hatutan: “Ita halo hela levantamentu ba profesór sira ne’ebé mak moras prolongada, ministériu identifika ona atu halo mudansa ba sira ne’e tuir dadus hatete sira labele kontinua iha prosesu hanorin”, nia tenik.
Notísia relevante: ME sei prioritiza problema infrastrutura edukasaun iha teritóriu
Jornalista : Osória Marques
Editora : Rita Almeida
