DILI, 02 Abríl 2025 (TATOLI)-Diretór Diresaun Nasionál Infraestrutura no Edukativu iha Ministériu Edukasaun (ME), hatete ministériu identifika ona problema infraestrutura edukasaun akontese iha teritóriu hanesan saladeaula, dapur ba merenda eskolár, inklui morru protesaun ba eskola sira, nune’e sei prioritiza iha planu 2026.
“Eskola sira-ne’e ita identifika ona, halo ona levantamentu no kontinua identifika dadus sira ne’ebé diresaun nasionál infraestrutura sei presiza atu kompleta no bele konsidera planu prioridade iha 2026”, Helio Lopes dehan iha Vila-Verde, kuarta ne’e.
Nia hatutan, hirak ne’e dadus ne’ebé komprensivu husi sensu infraestrutura ne’ebé maihusi tékniku no servisu edukasaun munisípál sira.
“Ita seidauk bele dehan eskola hira maibé ita iha ona ita-nia metas ba 2026 hira, depende ba alokasaun orsamentu ne’ebé aprova, maibé ita iha ona planu infraestrutura ba 2026”, afirma.
Nia realsa, ministériu halo idenfikasaun ba nível eskolaridade hotu-hotu. “Dadus sira-ne’e mak ita tau hamutuk ita prioritiza tuir padraun ne’ebé define katak ida ne’ebé mak tenke uluk entaun ita estabelese mós ita-nia padraun para depois ita bele responde ida ne’ebé mak ninia kondisaun aat, grave no númeru estudante barak, liuliu iha área muitas remotas ne’ebé sira-nia kondisaun grave tebes-tebes”.
Nia hatutan, kona-ba konstrusaun dapur ba merenda eskolár iha tinan ida-ne’e la iha tanba limitasaun orsamentu maibé iha ona planu tinan oin sei halo konstrusaun ba dapur liu-liu ba ensinu báziku sira ne’ebé presiza tebes-tebes dapur hodi prepara merenda eskolár.
“Dapur mós hanesan planu prioridade ba Ministériu nia iha projetu infraestrutura ba oin, aumezmu tempu ita mós hetan apoiu konstrusaun dapur husi WFP, inklui projetu PNDS ne’ebé sira konstrui dapur tanba ne’e mak ministériu hanoin tinan oin prioritiza dapur, maibé depende ba orsamentu”, katak nia.
Helio Lopes hatutan ministériu sei konsidera dapur ba tinan tuir-mai ho fazeadamentu tanba merenda eskolár sai hanesan polítika nasionál ida ne’ebé atu garante funsionamentu no implementasaun ho efisensia no efikasia aumezmu tempu bele kompleta ho fasilidade sira hodi bele realiza programa merenda eskolár.
Nune’e mós morru protesaun ME sei tau prioridade maibé konsentra uluk ba fasilidade ne’ebé importante mak saladeaula no sira ne’ebé bele apoiu diretamente ba prosessu ensinu aprendizajen.
Notísia relevante: PN husu ME tau atensaun ba kondisaun infraestrutura eskola iha territóriu
Jornalista : Osória Marques
Editora : Rita Almeida
