OEKUSI, 11 Juñu (TATOLI) – Diretór Programa Nasionál Dezenvolvimentu Suku (PNDS), Rejiaun Administrativa Espesiál Oekusi Ambeno (RAEOA), João Bobo, informa iha fulan-ne’e, hahú implementa projetu reabilitasaun estrada rurál ba suku 18,
“Agora ami hahú rejista fornesedór, hafoin ita sei enkontru ho kompañia ne’ebé mak elejivél, dokumentu kompletu, kuandu ita haree komportamentu tinan kotuk sira mós di’ak, ita bele konvida mai tuir enkontru fornesedór atu esplika kona-ba lala’ok sira-nia servisu, mobiliza materiál oinsa, data ba implementasaun no kumpre kritéria ne’ebé PNDS hasai ona, ida-ne’e mak sei esplika ba fornesedór sira, antes ezekuta projetu sira,” nia dehan iha Oekusi, ohin.
Notísia relevante:Tinan ne’e, PNDS Oekusi implementa projetu 25 ho kustu rihun $900-resin
Nia informa, hafoin enkontru, kontinua fahe kedas koutasaun ba fornesedór sira atu priénxe mak hatene semak liu no laliu. Depoisde mak sei halo mós mobilizasaun traballadór, atu prepara projetu sira-ne’ebé hahú.
“Ha’u hanoin ita metade fulan Juñu ne’e nia klaran, ita bele hahú ona, atu implementa projetu PNDS iha suku no aldeia, tanba orsamentu ba suku 18 ne’e, husi nasionál transfere ona iha konta bankaria suku ida-idak, la inklui suku Monemeko no Kutete, tanba sira-nia osan direita ba Ministériu Administtrasaun Estatál, ne’ebé tinan ne’e ita sei ezekuta projetu 25 ho nia orsamentu rihun $900-resin,” nia dehan.
Diretór PNDS ne’e, esplika, tipu projetu sira iha kada suku lahanesan, balu reabilitasaun estrada, balu konstrui kapela, no harii eskola inklui irigasaun, exemptu bee-moos la inklui iha projetu PNDS tinan 2025.
Notísia relevante:PNDS Oekusi aprova projetu rua hodi implementa iha suku Monemeko no Kutete
Entretantu, projetu 25 ne’e kabe ba suku 18 la inklui suku foun rua, Kutete no Monemeko, mak hanesan iha sub-rejiaun Nítibe, suku Ban-Afi halo reabilitasaun estrada iha aldeia Hautefo no aldeia Kuanobe, iha suku Bene-Ufe halo konstrusaun irigasaun iha aldeia Manán, no reabilita edifisíu ba eskola primária.
Iha suku Lela-Ufe halo reabilitasaun ba estrada rurál iha aldeia Mahata, suku Suni-Ufe halo reabilitasaun estrada rurál iha aldeia Kabana no reabilita kapela iha aldeia Oélnanoe, suku Usitako, halo konstrusaun foun edifisíu moru haleu eskola, no konstrusaun moru haleu kapela iha aldeia Nítibe.
Iha sub-rejiaun Oésilo suku Bobometo halo reabilitasaun estrada rurál iha aldeia Oénoah, suku Usitaqueno halo reabilitasaun estrada rurál iha aldeia Níbin, iha suku Usitasa’e halo reabilitasaun edifisíu kapela iha aldeia Buqui.
Notísia relevante:PNDS Oé-Cusse sei devolve rihun $200 ba kofre Estadu
Iha sub-rejiaun Pante Makasar, suku Bobokase halo reabilitasaun estrada rurál iha aldeia Fatubijae, no aldeia Nusla’o halo konstrusaun moru protesaun ba edifisíu kapela. Iha suku Costa halo reabilitasaun estrada rurál iha aldeia Sanane, suku Cunha halo reabilitasaun edifisíu eskola primária iha aldeia Noafafo.
Iha suku Lalisuk halo reabilitasaun estrada iha aldeia Banoko, suku Lifau halo reabilitasaun estrada iha aldeia Oémolo, suku Naimeko halo reabilitasaun estrada iha aldeia Noque no reabilita mós kapela, suku Nípani halo reabilitasaun estrada rurál iha aldeia Bausiu, iha suku Taiboko halo reabilitasaun iha estrada rurál iha aldeia Hauboni.
Iha sub-rejiaun Pássabe, suku Abani halo reabilitasaun estrada iha aldeia Pássabe, suku Malelat halo reabilitasaun edifisíu postu saúde Malelat no halo mós konstrusaun foun ida.
Kona-ba suku foun rua Kutete no Monemeko, seidauk integra iha planu PNDS tinan ne’e, maibé sei hetan apoia direitamente husi Ministériu Administrasaun Estatál.
Jornalista: Abílio Elo Nini
Editór: Florencio Miranda Ximenes
