DILI, 11 Juñu 2025 (TATOLI)—Parókia Santu António Balibo liuhusi grupu foin-sa’e Duabesi hadi’a no pinta estátua mahein Santu António, iha ámbitu selebrasaun loron Santu António iha loron 13 Juñu.
Mundu tomak selebra loron ne’e, liuliu nasaun Portugal no Parókia sira ne’ebé harii ho naran Santu António, tanba ne’e ema hotu konsidera nu’udar mahein ne’ebé badinas no haraik-an, hanorin ema hotu atu banati tuir Maromak nia liafuan no badinas halo orasaun.
“Atividade reabilitasaun estátua Santu António ne’e ami joven sira husi Duabesi mak organiza malu hodi kontribui ba loron Santu António nian, tanba Parókia Balibo idéntiku ho naran Santu António,” Koordenadór Juventude Duabessi, Nelson da Cruz informa ba Ajénsia TATOLI via telefónika, Kuarta ne’e.
Notísia relevante : Dom Virgilio: Banati tuir Santo António sai protetór ba povu-nasaun
Nia konsidera, hanesan sarani ida tenke kria buat foun ba imajen estátua ne’e rasik atu ema hotu bele haree furak nafatin maski estátua ne’e harii kleur ona.
“Ha’u sempre motiva joven sira iha bairru laran katak kontribuisaun la’ós liuhusi talentu desportivu de’it maibé presiza tenke hakbesik-an mós ba igreja hodi kontribui mós ba kreatividade pintura,” sarani ne’e katak.
Nia dehan, joven sira-nia envolvimentu iha atividade igreja hatudu ona fiar ba Aman Maromak, maski dalaruma partisipasaun iha misa menus maibé nafatin fó neon no laran ba Maromak.
“Ami uza ekipamentu husi igreja no balun mós husi ami-nia rasik. Tinan-tinan ami sempre kria buat foun hanesan ne’e tanba inisiativa ne’e bele valoriza ami nu’udar sarani no joven ida,” nia katak.
Aleinde ne’e, iha mós atividade vizitasaun estátua Santu António, ne’ebé lori tama sai ba suku neen iha postu administrativu Balibo.
Jornalista : Alexandra da Costa
Editora : Julia Chatarina
