DILI, 12 Juñu 2025 (TATOLI) – Diresaun Nasionál Transporte Terrestre (DNTT) muda provizoriamente servisu atendimentu públiku, liuliu ba troka no trata karta kondusaun iha Akanunu-Hera bá Balide-Dili.
Desizaun ida-ne’e halo, tanba fiu fibra ótika ne’ebé Diresaun Nasionál Infraestrutura no Komunikasaun (DNIK) dada ba DNTT Akanunu kotu hodi afeta ba serbisu atendimentu públiku, liuliu ba serbisu sira ho baze ba internét.
Xefe Departamentu Sekretariadu Apoiu Tékniku Administrasaun DNTT, Nélson Sequeira, dehan fiu ne’e kotu iha semana kotuk, nune’e dezde segunda-feira ne’e atividade iha Akanunu la funsiona no halo públiku kestiona DNTT.
Tanba ne’e, foti desizaun hodi halo serbisu sira relasiona ho atendimentu ba karta kondusaun muda mai Balide to’o DNIK normaliza fiu ne’e.
“Ami tenta ona DNIK atu rezolve problema ne’e, maibé hetan informasaun katak demora uitoan. Tanba ne’e, ami husu ba públiku hahú ohin atendimentu ba maluk sira ne’ebé atu troka karta kondusaun ka trata karta kondusaun mai hasai invoice iha Balide, bá selu iha Banku, pois mak bá teste eskrita, orál no tama roda iha Akanunu. Rezultadu mai foti iha DNTT [Balide]”, Nélson Sequeira informa ohin.
Iha sorin seluk, Diretór DNIK, Ambrósio Amarál, informa fiu fibra ótika ne’e kotu tanba kauza husi alargamentu estrada husi Kuluhun to’o Bekora, ne’ebé tenke muda poste EDTL nian.
Maibé, ekipa téknika DNIK nian preparadu hodi hein ekipa Eletrisidade de Timor-Leste (EDTL) atu muda ai-riin eletrisidade, nune’e bele instala tutan fiu fibra ótika nian.
“Ami hein de’it EDTL halo nia serbisu hotu, DNIK mós dada fiu foun ba tutan kedas. Dada foun kuaze kilómentru tolu”, Ambrósio realsa.
Jornalista: Arminda Fonseca
Editora: Maria Auxiliadora
