VIKEKE, 12 Juñu 2025 (TATOLI)-Bispu Dioseze Baukau, Don Leandro Maria Alves, sei selebra loron Santu António ho sarani postu administrativu Lakluta, munisípiu Vikeke.
Atividade ba selebrasaun mak krisma ba ema na’in-90, komuñaun dahuluk ba ema na’in-62 no fó kazamentu ba pár-rua. Programa seluk mak prosesaun ba estasaun suku haat, animasaun múzika no formasaun husi parokia ba sarani sira hodi hametin fiar-nian.
Ho prezensa Bispu nian, Prezidente Autoridade Munisípiu (PAM) Vikeke, Francisco C.S de Gonzaga Soares, husu ba sarani sira kolabora ho parte igreja no seguransa iha ámbitu selebrasaun.
“Loron ida-ne’e, ita aproveita halo reflesaun ba ita-nia moris no espíritu Don Santu António horik ho ita”, katak nia.
Administradór postu Lakluta, Pascol Gama Martins, hateten selebrasaun ne’e autoridade dada bandeira tolu hanesan nasionál, vatikanu no reinu-nian ne’ebé hasa’e ona desde inisiu fulan ne’e, ho moradór husi suku haat mak hein iha igreja.
“Serimónia ida-ne’e sai hanesan kultura povu Lakluta nian, kada tinan ami sempre selebra loron Santo Antonio ne’ebé monu iha loron 13 Juñu”, Pascol Martins ba TATOLI iha parokia Lakluta, ohin.
Nia dehan selebrasaun ne’e hanesan kultura ne’ebé husik ona husi tempu bei-ala sira.
Ho prezensa Bispu nian, hanesan autoridade kontente tanba ho klima udan maibé Amu Leandro deside selebra ho sarani Lakluta.
Tuir observasaun TATOLI nian iha terrenu hatudu katak sarani sira entusiazmu simu Bispu ho vestuáriu tradisionál hanesan tais, keke no belak. Simu ho dadolin, tara tais no tebe-tebe.
Amu Leandro to’o iha fatin ne’ebá tuku 16.35. partisipa iha simu Bispu mak autoridade lokál, estudante no professor sira iha postu Lakluta.
Notísia relevante: Bispu Leandro: Kruz nu’udar bee-matan salvasaun
Jornalista : Vitorino Lopes da Costa
Editora : Rita Almeida
