DILI, 12 Juñu 2025 (TATOLI)—Centro Nacional Chega! Institutu Públiku (CNC, I.P) kada tinan sempre estabelese sítiu istóriku iha territóriu nasionál ho forma rua hanesan, plaka istórika no monumentu memoriál.
“Aleinde implementa plaka istórika, ita mós simu pedidu husi vítima sira hodi harii monumentu memoriál ba fatin istóriu sira-ne’ebé akontese iha tempu pasadu. Nune’e tinan ida-ne’e gasta orsamentu $6.000 ba implementasaun plaka istóriku 20 iha munisípiu Manufahi, Baukau, no Dili,” Diretór Ezekutivu CNC, I.P, Hugo Maria Fernandes, informa ba jornalista sira iha edifísiu CNC, I.P, Balide, Kinta ne’e.
Notísia relevante : Sítiu istóriku: Senopati 1 nakfilak sai fatin “Tatoli” atu tatoli
CNC, I.P mós sei apoiu fundu $1.600 ba komunidade iha Santa Kruz hodi implementa monumentu memoriál kona-ba akontesimentu iha loron 10 Maiu 1999, tanba vítima barak mak mate iha ne’ebá.
“Ita sei fó apoiu ba sira hodi bele halo memoriál ida ba sira. Entaun ita-nia prosesu ne’e mak hanesan hahú ho identifikasaun fatin sira-ne’e, kuaze munisípiu hotu inklui RAEOA ne’e ita identifika hotu atu nune’e tinan-tinan monta plaka istórika iha fatin ne’ebé identifikadu ona. Forma plaka ne’e rasik sei esplika jerál kona-ba fatin ne’e,” nia esplika.
Harii monumentu memoriál ne’e ho kustu boot uitoan la hanesan ho plaka istórika.
“Objetivu husi memoriál rua ne’e atu estabelese fatin ne’e nu’udar fatin reflesaun, bele mós ba apreende iha fatin ne’e,” nia katak.
Tuir planu CNC sei dezenvolve fatin istóriku sira sai sítiu ba konsiénsia, katak ema bele ba vizita fatin ne’e no halo reflesaun ida ba akontesimentu iha pasadu no to’o iha desizaun ida katak buat sira-ne’e labele akontese tan.
“Ita sei kria mapamentu ba fatin istóriku sira iha website atu nune’e ema hotu bele asesu informasaun detallu kona-ba fatin ne’e no antes sira to’o ba fatin ne’e sira mós hatene ona sentidu husi fatin referidu,” Diretór Ezekutivu institutu públiku esplika.
Jornalista : Alexandra da Costa
Editora : Julia Chatarina
