DILI, 12 juñu 2025 (TATOLI)–Federasaun Futeból Timor-Leste (FFTL) liuhusi Sekretáriu Jerál FFTL, José Adilson de Ribeiro, garante katak konstrusaun estádiu internasionál foun ne’ebé tuir planu sei harii iha Tasi-tolu la fó impaktu ba komunidade tanba ninia pozisaun konstrusaun okupa espasu mamuk.
“Ami-nia proposta konstrusaun estádiu foun ho kapasidade tuir padraun internasionál no daudaun ne’e iha prosesu nia laran, entaun Federasaun sei hein hela parseiru sira ne’ebé serbisu hamutuk ho Federasaun liga ba proposta daruak nian,” Sekretáriu Jerál hateten iha salaun Konferénsia FFTL, Formosa, Kinta ne’e.
Aleinde ne’e, konstrusaun ne’e sei laiha alargamentu espasu no antes ne’e ekipa husi Sekretaria Estadu Asuntu Toponímia no Organizasaun Urbana (SEATOU) fó ona markasaun iha uma-kain balun hodi hamamuk fatin.
“Iha proposta daruak ba konstrusaun estádiu internasionál FFTL serbisu hamutuk ho liña ministeriál balun hanesan Ministériu Juventude Desportu Arte no Kultura (MJDAK), Ministériu Planeamentu no Investimentu Estratéjiku (MPIE) no Ministériu Justisa (MJ) hodi haree kona-ba prosesu ida-ne’e,” nia akresenta.
Notísia relevante : Governu no FFTL sei asina memorandu ba reabilita no harii estádiu foun iha Dili
Iha sorin seluk, Ministru Juventude Desportu Arte no Kultura, Nelyo Isaac Sarmento, hateten, iha semana kotuk Prezidente FFTL aprezenta sira-nia intensaun ida atu koopera ho Governu hodi haree kona-ba infranstrutura desportu futeból.
“Federasaun submete proposta hodi hetan aprovasaun iha Konsellu Ministru, nune’e sira hakarak koopera ho Governu atu tau osan uitoan hodi apoiu Governu ba reabilitasaun estádiu munsipál Dili nomós konstrusaun estádiu internasionál foun ne’ebé sei harii iha Tasi-tolu,” Ministru tenik.
Governante ne’e haktuir, Federasaun propoin rai iha parte Tasi-tolu maibé ninia prosesu implementasaun la’ós atu hala’o kedan tanba sei iha hela faze diskusaun téknika entre Governu ho Federasaun hodi halo kalkulasaun ba orsamentu no define loloos estatutu rai hodi formaliza iha dokumentu.
“Asina kontrusaun ne’e tenke asina ho Federasaun Internasionál Futebol Asosiasaun (FIFA, sigla inglés) nune’e, Governu inklui parte relevante sira sei konvoka reuniaun téknika hodi haree tanba iha problema balun mós ita tenke atende. Hanesan komunidade ne’ebé hela besik iha ne’ebá entaun ita tenke diskute se mak atu selu, Governu mak selu ka Federasaun mak atu selu. Tanba ne’e buat sira-ne’e hotu ita tenke diskute ho kle’an”, nia esplika”, nia esplika.
Jornalista : Alexandra da Costa
Editora : Julia Chatarina
