Top

Sekretáriu Jerál OCITO deklara la hola-parte iha ICCTL

Sekretáriu Jerál Organizasaun Komunidade Intelektuál Timor Orientál, Lívio da Conceição Marcos, marka prezensa iha Notariadu husi klarifika legalidade OCITO. Imajen TATOLI/ Natalino Costa

DILI, 11 Juñu 2025 (TATOLI)—Sekretáriu Jerál Organizasaun Komunidade Intelektuál Timor Orientál (OCITO-sigla portugeza), Lívio da Conceição Marcos, deklara OCITO la hola-parte ba Organizasaun Igreja Katólika Karizmátika Timor-Leste (ICCTL-sigla portugeza).

Nia dehan, durante ne’e ICCTL deklara ba públiku katak organizasaun ICCTL nu’udár organizasaun ramu ida husi OCITO, más OCITO ne’e nu’udár organizasaun rezisténsia ne’ebé mak moris no hetan lisensa husi Diresaun Jerál Servisu Rejistu Notariadu Ministériu Justisa.

“Diresaun Jerál Servisu Rejistu Notariadu notifika Sekretáriu Jerál OCITO atu fó justifikasaun kona-ba ezisténsia ami-nia organizasaun OCITO. Ha’u hateten katak durante estabelese seidauk iha atividade ruma mak  ami halo, satan hola parte ih ICCTL. Tanba ne’e, membru sira-ne’ebé mak lori OCITO hodi halo fali atividade seluk ne’e tuir estatutu sei konvoka reuniaun estraordinária atu demite husi estrutura OCITO,” Lívio hateten ba jornalista sira iha edifísiu Notariadu, Kolmera, kuarta ne’e.

Notísia relevante: PCIC solisita MP detein dirijente ICCTL

Nia esplika organizasaun  OCITO ne’e  independente, husi rezisténsia to’o mai agora iha hanoin atu kontribui ba dezenvolvimentu povu no nasaun ida-ne’e.

Iha fatin hanesan, Diretór Jerál Servisu Rejistu Notariadu, Agostinho Gonçalves Vieira, hateten Ministériu Justisa liuhusi Notariadu notifika líder OCITO mai Notariadu atu  husu tuir OCITO tanba OCITO ne’e eziste legalmente iha Notariadu, maibé iha públiku lider ICCTL sira deklara fali katak ICCTL nu’udár ramu ida husi OCITO.

“Razaun bolu dirijente OCITO mai iha-ne’e tanba ICCTL halo deklarasaun katak sira iha lisensa tiha ona no fáz-parte husi ramu  OCITO. Tanba ne’e, ami halo notifikasaun bolu reprezentante Sekretáriu Jerál OCITO nian mai klarifika loos duni ka lae ICCTL ne’e fáz-parte OCITO, maibé nia dehan la loos,” nia afirma.

Agostinho esplika katak regra  Notariadu ne’e OCITO mak naran rejistu no hetan legalidade, enkuantu ICCTL  la rejistu iha Notariadu. Se iha indísiu katak  ICCTL lori fali naran organizasaun OCITO  ba halo fali atividade ne’e, Notariadu sei  suspende organizasaun ne’e nia atividade  tanba viola regra.

Jornalista: Natalino Costa

Editór: Xisto Freitas da Piedade  

 

Publisidade

Leave a Reply

Latest Post

error: Content is protected !!