TL partisipa Indo Defence 2025 hodi hametin parseria no moderniza forsa armada
JAKARTA, 12 Juñu 2025 (TATOLI)-Governu Timor-Leste liuhusi Ministru Defeza, Kontra-Almirante Donaciano do Rosário Gomes, daudaun ne’e partisipa espozisaun no forum Indo Defence 2025 ho tema “Parseria Defeza ba Pás no Estabilidade Globál” durante loron haat hahú husi 11-14 Juñu 2025 iha Jakarta Sentrál Indonézia.
Ministru Donaciano hatete eventu ne’ebé loke husi Prezidente Indonézia, Prabowo Subianto, halibur nasaun sira iha mundu hodi troka informasaun liga ho dezenvolvimentu teknolójia militár nian. Tanba ne’e, partisipasaun TL iha espozisaun ne’e bele fó mós indikasaun ligadu ho planu hirak ne’ebé iha ona atu dezenvolve rekursu defeza, liu-liu ekipamentu militár nian ba futuru.
“Espozisaun ida-ne’e nasaun sira ASEAN halo, nasaun barak iha mundu halo atu troka informasaun kona-ba teknolójia industriál defeza nian, liu-liu kona-ba área kombate, área apoiu umanitáriu, área dezastre naturál ne’ebe rai ida-idak dezenvolve hodi fó ba militár sira kumpre sira-nia misaun”, Governante ne’e hatete iha Jakarta.
Ministru Pedro Klamar Fuik hatutan hanesan Nasaun ki’ik, TL ho nia forsa armada ne’ebé transforma fazeadamentu iha modernizasaun, hodi forsa estruturadu no preparadu para garante sustententabilidade organizasaun.
“Hanesan ita hotu hatene Timor-Leste foin dezenvolve, 23 anos transformasaun forsa armada ida ne’ebé ki’ik, naturalmente presiza moderniza liuhusi atribuisaun ba materiál foun sira no ekipamentu ne’ebé mak nesesáriu, nune’e ita-nia militár sira la’os haree de’it maibé sira mós sente parte dezenvolvimentu mundu nian”, akresenta ministru.
Vise Xefe Estadu Maiór Forsa Armada, Majór Jenerál Calisto dos Santos Coliati, hateten espozisaun ekipamentu no arma militár fó hanoin ba komandu no kompeténsia tomak iha governu atu oinsá deside nesesidade ba moderniza forsa armada.
“Ida ne’ebe mak ita nesesita para depois bele fortalese ita-nia forsa defeza, depois ida ne’ebe ami hakarak, ida ne’ebe adaptavel no realistíku ho ita-nia realidade ami sei hato’o ba ministru bele ka-la’e no ministru mós haree ita-nia kapasidade finanseira, ida-ne’e kompeténsia ministru-nia”, katak Koliati.
Atividade ne’e partisipa hosi empreza ne’ebé fábrika materiál no ekipamentu militár hamutuk 1.180 hosi nasaun 55 iha mundu, no mós partisipa husi setór interesante oi-oin hosi defeza globál nasaun lubuk iha mundu.
Notísia relevante: Ministru Defeza Malázia fó sai prioridade prinsipál neen iha reuniaun ADMM 2025
Jornalista : Anito Soares
Editór : Agapito dos Santos
