DILI, 13 Juñu 2025 (TATOLI)-Diretór Asosiasaun Ezekutivu Asosiasaun Defisiénsia Timor-Leste (ADTL), Cesario da Silva, hatete tinan ne’e governu Autrália apoiu rihun $77 ba ADTL.
“ADTL hetan fundu husi governu Austrália ba períodu daruak nian ba tinan 2025 to’o 2026 ho montante rihun $77, períodu primeiru Autrália apoiu ona fundu rihun $60 ba ADTL”, nia dehan hafoin halo enkobtru trimestrál membru ADTL ba dala-25 iha Tower Fatuhada, sesta ne’e.
Diretór ne’e mos informa fundu husi períodu primeiru apoiu ba rede organizasaun defisiénsia hamutuk 11. “Kada membru organizasaun hetan rihun $5”.
Tékniku ba Igualdade Jéneru, Defisiénsia no Inkluzaun Sosiál, Carmeneza dos Santos Monteiro, hatete fundu ne’ebé governu Autrália fó ba ADTL, tanba nia mak sai-mahon ba ema ho defisiénsia hotu.
“Ezemplu ADTL fó apoiu ba Halibur Defisiénsia Matan Timor-Leste (AHDMTL) e Halibur Defisiénsia Rejiaun Oeste (ADRO) hodi fó formasaun braille ba ema ho defisiénsia matan atu bele lee no hakerek no organizaun sira seluk”, nia dehan.
Dadus ema ho kondisaun defisiénsia ne’ebé ho tipu oioin iha territóriu hamutuk 17,061.
Notísia relevante: Governu Austrália kompromete apoiu Ema ho Defisiénsia iha Timor-Leste
Jornalista : Osória Marques
Editora : Rita Almeida
