DILI, 13 Juñu 2025 (TATOLI) — Pasiente na’in-rua ne’ebé halo transferénsia husi ospitál referrál Maliana pozitivu raiva (rabies) inklui na’in-ida lakon vida, konfirmadu husi Laboratóriu Nasionál Saúde-Hospital Nasionál Guido Valadares (LABNAS-HNGV), Bidau, Dili.
Diretór Klínika husi Hospital Nasionál Guido Valadares (HNGV), Arcanjo de Jesus Sequeira Nunes, fó-sai katak, pasiente na’in-rua ne’ebé transfere husi ospitál referál Maliana pozitivu rabies inklui na’in-ida lakon vida.
Diretór ne’e haktuir, horikalan kazu rua transfere husi ospitál referál Maliana ho síntoma rabies, dahuluk ne’e joven idade 18 suspeitu rabies, tanba nia manifestasaun klíniku ne’e idrofobia, signifika ita fó bee karik hemu ladi’ak no horikalan pasiente ne’e mate iha sala emerjénsia.
“Ohin rezultadu Laboratóriu Nasionál Saúde sai katak konfirmadu ba pozitivu raiva,” Arcanjo de Jesus Sequeira Nunes, informa ba TATOLI liuhusi whatshApp, sesta ne’e.
Nia dehan, iha tán pasiente feto ida baixa iha pediatria HNGV ho idade tinan-hitu ne’ebé baixa hela ho manifestasaun klínika ne’ebé hanesan, katak asu tata fulan-rua liubá, maibé pasiente na’in-rua durante ne’e lahetan vasina rabies, nune’e de’it to’o kanek di’ak hafoin síntoma ne’e akontese fali.
“Pasiente mane ne’e asu tata fulan-tolu liubá no feto ne’e asu tata fulan-rua liubá, ho manifestasuan klínika ne’ebé hanesan katak ho istika aan, isin-manas no hemu bee karik ibun metin hela no dalan iis mós metin, na’in-rua ne’e ho kondisaun krítiku no mane ne’e mate horikalan,” nia katak.
“Pasiente a’in-rua ne’e rezultadu ohin sai ho pozitivu rabies,” nia katak.
Nia hatutan, iha tán pasiente bebé tinan hitu ne’e sei iha kondisaun grave iha sala pediatria nian.
Nia fó-sai katak, pasiente na’in-rua ne’e asu tata no manifestasaun klíniku típiku ho rabies nian, teste ba pasiente rasik ne’e halo ona, foti husi kabeen haruka ba laboratóriu nasionál saúde no rezultadu sai katak pozitivu rabies.
Kazu ne’e rasik daudaun ne’e iha ona munisípiu sira hanesan Kovalima, Oekusi, Bobonaru no Ermera.
“Tanba ne’e presiza fahe informasaun ba populasaun sira hotu katak kuidadu idak-idak nia aan, tanba rabies nia taxa mortalidade iha nível mundiál 100 %, tanba ne’e presiza reforma vijilánsia nasionál atu halo atuasaun atubele kontrola animál sira,” nia katak.
Nia dehan, síntoma rabies ne’ebé akontese mak hahú isin-manas, kolen, estika-aan tanba virus ne’e halai tuir ba ruin hodi halo viajen ba isin-lolon, tama ba kakutak no to’o ona garganta metin ona mak bele hamosu taxa moratlidade aas.
“Tanba ne’e husu ba komunidade banhira asu tata karik ba kedas sentru saúde ne’ebé mak besik hodi simu vasina rabies hodi prevene moras ne’e,” nia konklui.
Notísia relevante: Joven ida iha Maliana hakotu iis tanba infetadu virus raiva
Jornalista: Felicidade Ximenes
Editór: Evaristo Soares Martins
