BOBONARU, 13 juñu 2025 (TATOLI)—Bazeia ba rezultadu analiza husi Laboratóriu Nasionál hatudu katak joven mane ida ho naran Ricardo T Lopes, ho idade 19, husi aldeia Lolo’a, suku Holsa, postu administrativu Maliana, munisípiu Bobonaru mate kauza husi infetadu virus raiva.
Joven mane ne’e transporta husi Hospitál Referál Maliana bá Hospital Nacional Guido Valadares (HNGV) no hakotu iis iha Kuarta kalan tuku 22:45.
“Nia amosta kaben ne’e haruka bá Dili horiseik tuku 15:00 lorokraik no rezultadu ohin tuku 13:00 liu ne’e sai hatudu katak alin ida mate ne’e pozitivu raiva nomós pasiente labarik feto ida ne’ebé agora sei baixa hela iha Dili,” Diretór Servisu Saúde Munisípiu Bobonaru, Gil Bernardo Vicente, informa ba jornalista sira iha ninia knaar fatin, Sesta ne’e
Liga ho asuntu ne’e, ekipa husi Servisu Saúde Bobonaru sei kontinua halo sensibilizasaun ba komunidade hodi bele prevene-an husi moras ne’e.
“Ha’u mós hakarak fó hatene ba komunidade hotu iha munisípiu Bobonaru atu nafatin kuidadu-an tanba ita iha Fronteira asu pozitivu raiva ne’e barak, ne’ebé favór ida asu ne’ebé iha kesi tia no tenke vasina, se karik sira ne’ebé asu tata halo favór hakbesik-an mai fasilidade saúde hodi hetan vasina,” nia akresenta.
Notísia Relevante : Maliana sai fatin risku ba transmisaun virus Raiva
Diretór Ezekutivu Hospitál Referál Maliana, José Marçal da Cruz, konfirma iha Kinta (12/06) pur volta tuku 10:00, joven mane mai konsulta tanba asu tata no ho kondisaun agresivu.
Diretór haktuir, asu tata Ricardo iha fulan-rua liubá maibé nia hela de’it iha uma no la hakbesik-an ba fasilidade saúde hodi simu vasina.
“Ita-nia alin mane ne’e husi doutór sira haree katak ninia sintoma hanesan asu siak, tauk naroman, lakohi haree ema barak, depois tenke halo tuir nia hakarak de’it, bainhira nia toba, tuur halo tuir de’it, nia hakarak sai bá li’ur ita halo tuir nia hakarak. Horisehik ami haree nia hakarak sai mai lori ho soru iha liman, sai mai tuur iha varanda Ospitál, ami halo tuir nia hakarak de’it, depois lori fali bá laran, tuur la hakmatek, ita-nia alin ne’e agresivu liu, entaun doutór foti desizaun halo referál bá Dili,” nia katak.
Notísia Relevante : Janeiru-Maiu: DSMA Bobonaru vasina ona animál 23,467
Mate-isin daudaun ne’e iha hela prosesu transportasaun husi Dili bá nia rezidénsia iha Bairru Dom Bosco, Maliana.
Tuir dadus husi ekipa Vijilánsia Epidiomolojia Servisu Saúde Munisípiu Bobonaru, hahú Janeiru to’o Kinta (12/06) rejista asu tata ema na’in-80 no daudaun ne’e labarik feto ida ho idade tinan 7 husi suku Saburai baixa hela iha Ospitál Referál Maliana hafoin asu tata iha fulan-ida liubá.
Jornalista : Sergio da Cruz
Editora : Julia Chatarina
