BOBONARO, 22 outubru 2024 (TATOLI) – Xefe Departamentu Pekuária no Veterinária, Diresaun Agrikultura Munisípiu Bobonaro, Aleixo Soares, hateten postu administrativu Maliana daudaun ne’e sai fatin risku boot ba transmisaun moras Raiva, tanba identifikadu asu barak mak pozitivu virus referida.
Nia dehan, bazea rezultadu teste amostra iha laboratóriu nasionál hatudu asu hamutuk 18 iha munisípiu Bobonaro detetadu pozitivu virus Raiva hafoin tata ema.
Kazu hirak-ne’e rejista mai husi postu administrativu neen, maibé barak liu postu administrativu Maliana Vila.
Notísia relevante: Asu pozitivu virus Raiva tata ema na’in-tolu iha Obor Maliana
“Ita iha munisípiu Bobonaro postu Maliana ne’e risku boot ona, tanba suku hira iha Maliana ne’e kuaze asu atu tata hotu ona ema, agora asu sira-ne’e bulak hotu ona naran tata arbiru de’it, ne’ebé ita tenke atensaun labele dehan asu siak, bainbain oan nurak mak tata, ne’e laloos, di’akliu tata ona ema lori ba ospitál, depois asu ne’e mós ita halo teste iha laboratóriu, atu labele daet ba seluk,” nia informa ba TATOLI, iha Maliana, tersa ne’e.
Aleixo hatutan, iha loron-segunda loron ne’e mós identifika tan asu tata ema na’in-rua, ida iha bairru Hospital -Tuan, Maliana, suku Holsa no ida seluk husi postu administrativu Cailaco.
“Ida iha Maliana ne’e sira parte DHS señor diretór Gíl telefone mai, ha’u orienta kedas ekipa sira ba Koko asu ne’e, rezultadu pozitivu duni moras Raiva, entaun asu ne’e sira hasai tiha kakutak mai tau iha jeleira atu ba koko tán iha Dili, labarik ne’e mós simu ona vasina, depois ida Cailaco nia ami labele ba tanba ekipamentu hanesan tapid test mós laiha ona, depois problema transporte, kombustível,” nia dehan.
Alende tata ema, iha parte bairru SMP1 Maliana mós asu tata bibi ida no asu ida.
“Ami-nia kolega sira ba teste, rezultadu pozitivu raiva, bibi nia ulun ne’e agora rai hela iha-ne’e, maibé ita seidauk hatene loloos, ita sei haruka fali ba nasionál atubele hatene klaru,” nia esplika.
Xefe Departamentu Pekuária no Veterinaria ne’e mós apela ba hakiak-na’in sira atu koopera ho ekipa vasinadór sira hodi entrega asu simu vasina nune’e bele prevene-an husi virus raiva, tanba moras ne’e perigu ba ema-nia vida.
Alende ne’e husu mós komunidade hotu no hakiak-na’in sira iha postu administrativu neen, liuliu Maliana Vila labele halo kontaktu direita ho asu ne’ebé ho kondisaun agresivu.
“Ita tenke hadook-an, ita lori buat ruma hodi salva ita-nia an, sé lae asu ne’e tata perigu la halimar, tanba raiva ne’e la’ós de’it ba asu, maibé asu tata ita mós afeta hotu ba moras ne’e, estraga ita-nia kakutak, ita mós bele mate,” nia akresenta.
Enkuantu durante ne’e ekipa vasinadór na’in-18 mak halo vasinasaun anti-rabiótika ba asu sira-ne’ebé eziste iha munisípiu Bobonaro.
Tuir dadus husi Diresaun Nasionál Veterinaria Ministériu Agrikulta, Pekuária, Peska no Floresta, katak asu hamutuk 10,369 (70%) mak simu ona vasina antirabiótika.
Notísia relevante: Maliana-oan presiza oferese asu simu vasina
Jornalista: Sérgio da Cruz
Editór: Evaristo Soares Martins
