BOBONARO, 03 Juñu 2024 (TATOLI) – Diretór Servisu Munisipál Agrikultura Munisípiu Bobonaro, Longuinhos João, husu ba komunidade sira iha postu administrativu Maliana atu kolabora ho ekipa tÉkniku sira hodi oferese animál Asu simu vasina Antirabiotika hodi prevene virus Raiva ka asu-bulak labele transmite ba ema nia isin-lolon.
Longuinhos João, hato’o apelu tanba foin lalais ne’e rezultadu analiza amostra iha laboratóriu nasionál hatudu asu ida pozitivu infetadu virus tata labarik mane ida iha aldeia Solugoli, suku Holsa, postu administrativu Maliana, iha loron-kuarta, 29 maiu liubá.
Tuir nia, durante ne’e komunidade sira balu koopera no kolabora di’ak tebes ho ekipa vasinadór sira, maibé ba hirak-ne’ebé nia animál liu liu asu, busa no lekirauk seidauk simu vasina, hahú agora tenke simu vasina, atubele apoia governu hamutuk salva ema-nia vida.
Notísia relevante: Asu pozitivu Raiva tata labarik ida iha Holsa
“Ita agora atu salva ema-nia vida,ita la’ós atu salva asu nia vida, valór ida-ne’ebé mak boot liu, asu nia ka ita ema-nia vida mak boot liu. Ida-ne’e imi tenke hanoin didi’ak,” nia hateten iha Maliana.
Nia hatutan, dadaun ne’e ekipa tékniku liuhusi Departamentu Pekuária no Veterinaria kontinua halo atividade vasinasaun tama sai uma, iha postu administrativu Maliana inklui suku sira-ne’ebé besik liña fronteira sira hanesan iha postu administrativu Balibó no Lolotoe.
Diretór Servisu Munisipál Saúde Munisípiu Bobonaro, Gil Bernardo Vicente, fó hanoin katak bainhira identifika asu tata ema ruma presiza lori lalais ba fasilidade saúde, tanba virus Raiva perigu ba ema-nia vida.
“Ai-moruk kona-ba virus ne’e laiha, ita só iha de’it vasina, ne’ebé husu nafatin ba komunidade sira ne’ebé iha asu entrega ba ekipa sira hodi simu vasina, nune’e labele lori moras ba ema, tanba ita Bobonaro iha kazu asu ida pozitivu virus Raiva,” nia hateten.
Tuir dadus ne’ebé Ajénsia Tatoli asesu katak, vasina antirabiotika faze dahuluk iha munisípiu Bobonaro fó ona ba asu hamutuk 4,817, busa 150, lekirauk 30.
Enkuantu bazeia ba dadus ne’ebé Servisu Saúde Munisipál Bobonaro rejista hahú husi janeiru to’o agora asu tata ema na’in 34, husi númeru ne’e simu hotu ona vasinasaun.
Notísia relevante: Dioseze Maliana apoia Governu halo prevensaun hasoru virus Raiva
Jornalista: Sérgio da Cruz
Editór: Evaristo Soares Martins
