BOBONARO, 03 abríl 2024 (TATOLI) – Ministériu Saúde liuhosi Diretora Jerál Kuidadu Saúde Primária, Elisabet Leto-Mau, hamutuk ho ekipa no Diretór Servisu Munisipál Saúde, Autoridade Munisípiu Bobonaro,Gíl Bernardo Vicente, tersa ne’e hasoru malu ho Bispu Dioseze Maliana, Dom Norberto do Amarál, hodi partilla informasaun kona-bá moras Raiva no husu igreja atu habelar medida preventiva ba sarani sira.
Hafoin enkontru, Bispu Dioseze Baucau, Dom Norberto do Amarál, esplika, ba oin sei hasai karta ida ba Parókia hotu-hotu ne’ebé pertense ba Dioseze Maliana, atu habelar informasaun no bolu atensau ba sarani sira hodi bele hado’ok-aan hosi moras Raiva inklui moras Dengue tanba munisípiu Bobonaro okupa númeru daruak kazu Dengue rejista aas.
Notísia relevante: Timoroan ida mate ho virus Rabies iha HNGV
“Igreja sempre apoia programa governu liuliu hosi saúde nia sempre mai, agora ho moras Raiva ne’e, igreja sei fó hatene ba sarani sira liuhosi omília loron-domingu,” Dom Norberto informa ba Jornalista sira, iha Kámara Dioseze Maliana.
Prezidente Konferénsia Episkopál Timorense (CET, sigla portugés), sei konsiensializa komunidade sira atu ida-idak tau iha neon ho laran no kumpre medida preventiva ne’ebé parte saúde fó-sai.
“Ita hakarak ka lakohi moras ne’e afeta ba ita-nia saúde hotu, saúde ne’e importante, ita dehan saúde iha ita-nia liman, oinsá mk ita tau-matan ba saúde. Ne’e duni loke ita-nia neon ho laran atubele kolabora ho saúde nune’e planu sira ne’e bele sai di’ak to’o rohan,” Amu-lulik ne’e hateten.
Diretora Jerál Kuidadu Saúde Primária hosi Ministériu Saúde, Elisabet Leto-Mau, hateten, igreza iha papél importante tebes atu apoia governu hodi halo sensibilizasaun ba komunidade sira atu moras Raiva labele halo transmisaun hosi animál ba ema, tanba moras ne’e rejista no hamate ona ema iha Rejiaun Administrativa Espesiál Oe-Cuse Ambeno (RAEOA).
“Ami mós tún ba komunidade sira, maibé dalaruma sira rona, tama hosi tilun sorin sai hosi tilun sorin, ha’u fó ezemplu iha Oe-Cuse depois asu tata ema sira oho fali asu ne’e halo fali modo, ne’e tanba laiha koñesimentu kona-ba moras ne’e,” nia fó hanoin.
Nia dehan governu halo esforsu oinoin ne’e, tanba moras ne’e rejista a’as iha nasaun viziñu Indonézia no fasil tebes atu transmite mai Timor-Leste.
“Ita fó prioridade ba fronteira sira-ne’e hanesan Lolotoe, Batugade, Balibo no Maliana, tanba fronteira entre ita ho Indonézia dalaruma la’o ba mai ne’e, tanba de’it família, maun-alin, entaun la’o livre no balu tama mai lori kedas ho asu, sira mai mak asu ne’e tata fali ita-nia ema, moras ne’e bele daet ona mai ita hotu,” nia katak.
Enkuantu iha tempu badak Ministériu Saúde sei akordu ho ho parte Igreja atu apoia programa saúde nian, nune’e sarani sira bele hetan informasaun ne’ebé kredivel hodi hado’ok-aan hosi moras Raiva inklui moras seluk ne’ebe perigu ba ema-nia vida.
Notísia relevante: MS-Autoridade Bobonaro estabelese ekipa Task Force halo prevensaun hasoru virus Rabies
Jornalista : Sérgio da Cruz
Editór : Evaristo Soares Martins
