BOBONARO, 04 outubru 2024 (TATOLI)-iha kinta kalan maizumenus tuku 07:00 akontese Asu pozitivu virus Raiva ida tata ema na’in-tolu kompostu husi mane ida no labarik feto na’in-rua iha bairru Obor, suku Raifun, postu Administrativu Maliana, munisípiu Bobonaro.
Tékniku Veterinária husi Diresaun Servisu Munisipál Agrikultura, Munisípiu Bobonaro, Casemiro Mau, esplika Asu ne’e deteta pozitivu liuhusi Rapid Test, hafoin tata ema na’in-tolu kompostu husi na’in-rua, asu na’in aman ho oan no ida viziñu.
Notísia relevante: Labarik ida iha Balibo hatudu síntoma moras Raiva
“Ami simu informasaun husi ita-nia komunidade, katak Asu tata ema na’in tolu no Asu ne’e komunidade mak baku mate ona iha sira-nia uma, entaun ekipa tékniku ami to’o kedas iha sira-nia uma, ami halo rapid rest, sampel ne’e ami teste kedas iha fatin akontesimentu rezultádu pozitivu, depois hotu ami ke’e rai, hakoi taka metin kedas,” nia informa ba Jornalista sira iha Obor, sesta ne’e.
Diretora Nasionál Veterinária husi Ministériu Agrikultura, Pekuária, Peska no Floresta, Joanita Bendita da Costa Jong, fundamenta Asu ne’e afetadu virus Raiva, tanba durante ne’e na’in la koopera ho ekipa vasinadór hodi simu vasina kontra Raiva.
“Iha fulan kotuk liubá ekipa sira mai teste Asu ida iha fatin ne’e deteta pozitivu virus Raiva, antes teste ne’e Asu ne’e tata ona Asu seluk, signifika Asu ne’e mate nia transmite ona ba Asu seluk, entaun ekipa vasinadór mai, maibé na’in la fó sira-nia Asu ba ekipa atu vasina,” nia esplika.
Direitora ne’e dehan, Asu referida tata fali na’in tanba virus domina ona nune’e halo Asu ne’e agresivu no siak liután.
“Wainhira ita la fó Asu sira-ne’e vasina, nia lala’ok hanesan ne’e, bainhira nia kona ona virus ne’e, hatudu sinál klínika, nia gosta ba subar iha fatin nakukun, tanba nia ta’uk naroman, ta’uk bee, nia subar iha nakukun,” nia esplika.
Entertantu Diretór Servisu Munisipál Saúde, Munisípiu Bobonaro, Gíl Bernardo Vicente, konfirma hafoin Asu tata, vitima na’in-tolu ba kedas halo tratamentu iha Hospital Referál Maliana no daudaun ne’e simu ona vasina anti Raiva.
“Agora sira fila ona ba sira-nia fatin, maibé kada semana ami-nia ekipa husi sentru saúde kontinua halo monitorizasaun beibeik perkembangan husi sira ne’ebé asu tata ne’e atu hatene iha mudansa ka lae,” Gíl Bernardo Vicente katak iha kna’ar fatin.
Gíl Bernardo relata tuir dadus ne’ebé Diresaun Servisu Saúde Munisípiu Bobonaro rejista durante ema ne’ebé Asu tata hamutuk 190 kompostu husi feto 87, mane 103. Vítima hirak ne’e mai husi postu administrativu Atabae 13, Balibó 21, Bobonaro haat, Cailaco 13, Lolotoe Tolu no barak liu iha postu administrativu Maliana ho totál ema na’in 135.
“Husi númeru Asu tata ema na’in 94 mak simu ona vasina Antirabiotika, restu la vasina razaun tanba estoke vasina mamuk no balu vasina iha lakohi mai simu, ema sira ami sempre kontrola,” nia hateten.
Tuir dadus ne’ebé ekipa vasinadór Munisípiu Bobonaro rekolla iha terrenu, hahú husi fulan fevereiru tinan 2023 to’o agora konsege vasina ona asu hamutuk 10,510 cabeças.
Alende ne’e liuhusi rapid test mós ekipa tékniku veterinária munisípiu Bobonaro deteta Asu pozitivu virus Raiva hamutuk 18, númeru ne’e rejista maioria iha postu administrativu Maliana.
Área sira-ne’ebé detetadu Asu pozitivu mak hanesan suku Holsa, Lahomea, Raifun, Ritabou, Odomau no Tapo-Memo.
Alende ne’e dadus nasionak ne’ebé ekipa MAPPF rekolla husi Munisípiu Bobonaro, Covalima, Rejiaun Administrativu Oe-Cuse Ambeno (RAEOA) no Atauro Asu ne’ebé simu ona vasina hamutuk rihun 49-resin.
Notísia relevante: Asu pozitivu Raiva tata labarik ida iha Holsa
Jornalista: Sérgio da Cruz
Editór: Evaristo Soares Martins
