SEFOPE husu TATOLI kontinua ezerse nia funsaun tuir Kódigu Étika Jornalístika

DILI, 22 Jullu 2026 (TATOLI)—Sekretáriu Estadu Formasaun Profisionál no Empregu (SEFOPE), Rogério Araújo Mendonça, husu mídia estatál Agência Notisioza Timor-Leste (TATOLI) atu kontinua ezerse nia funsaun tuir Kódigu Étika Jornalístika ne’ebé iha.

“Fiar katak mídia estatál ka nasionál ne’ebé mak iha ita-nia rai Timor-Leste, bele ezerse ninia funsaun tuir regra ka kódigu étika jornalizmu ne’ebé iha hodi hetan nafatin konfiansa husi públiku,” Sekretáriu Estadu Formasaun Profisionál no Empregu (SEFOPE), Rogério Araújo Mendonça, hato’o kestaun ne’e ba Agência Tatoli relasiona ho aniversáriu TATOLI ba da-X ne’ebé sei selebra iha 27 Jullu 2026, iha nia kna’ar fatin, Kaikoli, ohin.

Governante ne’e konsidera, papel mídia importante tebes hodi rekolla no fahe informasaun kona-ba prosesu konstrusaun Estadu husi entidade oioin ba públiku tanba husi mídia mak ema hotu bele asesu informasaun.

“Mídia Tatoli agora mudansa tebes tanba uluk tranzmite de’it informasaun husi plataforma ida maibé agora bele liuhusi plataforma oioin liuliu ho teknolojia ne’ebé mak avansadu. Deseju bele iha mudansa boot liután ba iha futuru,” nia dehan.

Sekretáriu Estadu parabeniza Ajénsia TATOLI ne’ebé halo nia aniversáriu ba da-X (27 Jullu 2017 – 27 Jullu 2026) ho publikasaun ne’ebé kontinua kobre ba dezenvolvimentu nasionál.

Ajénsia TATOLI, I.P nu’udár ajénsia ofisiál Estadu Timor-Leste nian. Ezisténsia TATOLI, I.P. maihusi inisiativa Sekretaria Estadu Komunikasaun Sosiál (SEKOMS), iha 2012-2017 nu’udár transformasaun husi ETNA (East Timor News Agency), ne’ebé nakfilak ba ANTIL (Ajénsia Notisioza Timor-Leste).

Ajénsia Estadu ne’e hetan aprovasaun iha Konsellu-Ministru no públika iha Jornál Repúblika iha loron 14 Marsu 2016, nu’udár embriaun ho naran ANTIL ne’ebé lansa iha 27 Jullu 2016. Fulan-Marsu 2017, Konsellu-Ministru aprova ANTIL sai TATOLI, nu’udár ajénsia ofisiál Estadu Timor-Leste nian no publika iha Jornál Repúblika, ho estatutu nu’udár Institutu Públiku (I.P.).

Objetivu estabelese ajénsia TATOLI, I.P. sai fonte informasaun ofisiál Estadu Timor-Leste neʼebé iha kapasidade elabora produtu informasaun no notísia ne’ebé nesesita husi públiku utilizadór informasaun iha eskala nasionál, rejionál no internasionál bazeia ba natureza no karakterístika; rapidéz no rigór, maibé labele ignora nia rigorozidade hanesan akurásia, indepedente, inzenta, klareza no nafatin iha integridade no mós kredibilidade.

Kódigu Étika Jornalístika

Sira-ne’ebé hala’o atividade jornalístika iha Timor-Leste kompromete-an atu:

1. Defende sidadaun nia direitu atu asesu ba informasaun no buka lia-loos;
2. Fó hatene faktu sira ho rigor, ezatidaun, onestidade no independénsia no klarifika loloos diferensa entre notísia ho opiniaun;
3. Kombate forma sensura hothotu no defende liberdade imprensa no liberdade espresaun;
4. Sempre hetan informasaun, dokumentu no imajen sira ho forma legál no profisionál, respeita kompromisu konfidensialidade ho fonte informasaun sira, hanesan off the record, pedidu konfidensialidade no embargo;
5. Salvaguarda prezunsaun inosensia arguidu iha prosesu tribunal nia laran to’o hetan desizaun finál husi tribunál no respeita vitima krime no nia familia sira-nia identidade, ho kuidadu espesiál atu husik nu’udar anonimato ba vitima krime seksuál no labarik sira ne’ebé sai arguidu;
6. Konfirma no verifika informasaun hothotu ne’ebé simu molok atu públika, rekoñese informasaun sira-ne’ebé sala hafoin publikasaun no hadi’a lalais kedas, respeita sidadaun nia direitu atu hatán;
7. Defende igualdade, la halo diskrimanasaun bazeia ba rasa, etnia, fiar, dalen, estatutu sosiu ekonómiku, opsaun polítika, jeneru, seksu, defisiénsia ka ho razaun seluk;
8. Respeita sidadaun hothotu nia moris privadu, nia direitu ba onra, naran di’ak no privasidade, exeptu bainhira defeza ba interrese públiku iha kauza;
9. Rejeita forma plájiu hothotu no labele simu subornu ka oferta ruma ne’ebé bele influensia ninia independénsia profisionál. Identifika ho loloos fonte no autór husi informasaun ne’ebé nia uza no klarifika ba públiku kona-ba informasaun sira-ne’ebé nia hetan tanba hetan tulun finanseiru husi ema ka entidade ruma;
10. Evita publika liafuan, imajen, lian ne’ebé transmite sadismu ka violénsia hasoru ema ka balada ne’ebé iha natureza hakanek públiku nia sentimentu.

Jornalista : Alexandra da Costa

Editór        : Cancio Ximenes